Aizawl: Tun hnaia 46th Annual News & Documentary Emmy Award dawngtu BBC team-a tel Mizo journalist pahnih – HC Vanlalruata leh Isaac Zoramsanga-te chu MNF Sr. Vice President Dr R Lalthangliana’n nimin khan Aizawl Press Club-ah chawimawina/lawmpuina thuziak a hlan.
Lawmpuina thuziak hlantu Dr R Lalthangliana chuan khawvel huapa lawmman ropui tak mai dawngtute chu chhuanawm a tih thu leh thinglung taka a lawmpui avanga hetiang hun hi buatsaih a ni tih sawiin, “India ram mai ni lo, khawvel huap chawimawina an dawng hian Zofate dinhmun sangah min hlangkai a, mi dangte tan a entawntlakin, chona nasa tak a ni,” a ti.
Dr R Lalthangliana chuan kum 2003- 2008 chhung khan I&PR Minister a lo nih tawhnaa journalist-te tana theihtawp a lo chhuah thin thu sawiin, journalist-te khawvel huapa an lang chu a hlut hle tih a sawi bawk.
Inkhawmah hian MJA Vice President C Lalhmachhuana leh award dawngtu journalist pahnihte pawhin thu an sawi.
Dr. R. Lalthangliana hi MNF Publicity Board hotuten tawiawmin, MJA member an tel bawk.