Myanmar-a CDF leh CNDF te inkahna avangin Khawmawi atanga Zokhawthara raltlan chu Inrinni zan thleng khan mi 2,523 an tling tawh.
The Zozam Times thudawn danin, Tiau (Khawmawi), Myanmar ram chhunga CDF leh CNDF te chu ni hnih thum kaltaa silaia an inkahna chu tun dinhmunah silai thawm hi reh rih nia sawi a ni.
Zohnahthlak sipai pawl pahnihte an inkah chhan tak hi hriat chian fak theih ni lo mah se, Tiau-a insumtawnna inchuhna vang nia sawi a ni.
Zokhawthar YMA chuan he inkahna avangin Zokhawthar lamah silaimu tam tak a len luh avangin, an khaw mipui nun tiralkhel thei zawnga silai hmet puak tawh lo turin information au rinna hmangin an au hial a ni.
Rih leh Khawmawi mipuite chu Mizoramah an tlanchhe deuh vek nia sawi a ni a. Zokhawthar hian lo mikhualin Inrinni zan thleng khan Zokhawtharah raltlan mi 2,523 an tling tawh nia thudawn a ni.
Zokhawthar YMA ruahman angin raltlante hi mahni chhungte belh tur nei chu an chhungte bel tura hriattir an ni a. Chhungte belh tur nei lote chu Zokhawthar YMA Hall leh relief camp-ah awm tir an ni.
Hetih lai hian C. Lalhmuakmawia (37) s/o Khawmawii, Chanmari West, Aizawl chu CNDF leh CDF inkahnaah Inrinni tlai khan silai mu tawngin a thi a. A ruang hi CNDF-ten hun eng emaw chen lak an phal loh hnuah Inrinni zan khan Mizoramah lak luh a ni a. Nimin zing khan a ruangin Chanmari West thlengin, nimin tlai dar 3:00 khan vui nghal a ni.
C Lalhmuakmawia hian CDF leh CNDF te inkahnaah hian CDF a zawm ve nia thudawn a ni.
Inkahhai
Central YMA chuan Myanmar ram chhung, Chin Hills-a Chin National Organisation (CNO) leh Hualngoram Peoples Organisation (HPO) te inkara buaina leh inkah hial a chhuah chungchangah, heng pawl pahnih hruaitute hi Inrinni zan khan Tuikhuahtlanga Central YMA pisaah lengah sawmin a kawm.
An inkawmnaah CNO leh HPO inkar buaina avangin mihring nunna chan an awm leh nunau sang tam tak thlabar manganga an awm chungchang an sawi ho a ni.
Pawl pahnih hruaitute hian Central YMA hruaitute ngenna angin mipui nunau ten an tawrh zel lohnan tun dinhmunah chuan inkahhai (ceasefire) neih an remti a. A tul angin pawl pahnih inkara inhriatthiam lohna hrang hrangte chu la sawiho zel nise an ti.