Thawhtanni atanga parliament fur thutkhawm tan turah bill pariat pharh a ni dawn a, President’s Rule-a Manipur a awm zui theihna tur pawh put luh a nih rin a ni.
Fur thutkhawm hi thutkhawm 21 awmin August 21 thleng awh tur a ni a, August 12 leh 18 inkar erawh chawlh a ni a ang a. Tun tum session-ah hian rorel lai leh Congress kaihhruai INDIA tangrual chu an inbeih nasat leh hle rin a ni.
Tun tum thutkhawma thawm nei ring tur zingah Election Commission-in kumin kum tawpa Bihar assembly inthlan hma lawka ‘Special Intensive Revision (SIR)’ a kalpui chu a tel a. Congress leh Rashtriya Janata Dal (RJD) chuan inthlan hma lawka voter list ennawn chu tih dan tur ni lovah an ngaih laiin inthlan buaipuitute erawh chuan hei hian inthlan zalen, dik leh langtlang a siam dawn niin an sawi thung.
Parliament thutkhawmah hian Pahalgam-a mi firfiakte chetna leh hemi kal zela India-in Operation Sindoor a kalpui chu sawi chhuah ngei a nih a rinawm bawk.
Sorkar chuan session hnuhung bera a pharh tawh, Income Tax Bill chu pawm tura a chhawp chhuah leh a tum a, session hmasaah khan joint parliamentary committee hnenah en tha leh tura tih a ni.
Finance Minister Nirmala Sitharaman-i’n February thlaa a pharh khan Income Tax Act, 1961 thlakna tur leh mi nawlpuiin awlsam taka an hriat thiam theih tur tiin a sawi a. Tun tumah hian an pawm a nih chuan April 1, 2026 atanga hman tan a ni ang.
Bill dang pharh tur zingah National Sports Governance Bill, National Anti-Doping Amendment Bill leh Land Heritage Sites and Land Remains (Conservation and Maintenance) bakah Mines & Minerals Amendment Bill a tel bawk.
Manipur-a President’s Rule puan mek pawh seina tur resolution chu sorkarin a chhawp chhuah rin a ni bawk a. Hmarchhak state hi kum hnih chuang chi leh chi inkara buaina a tuam hnuah February thla khan Chief Minister N Biren Singh-a a bâng a, a hnu lawkah sorkar laipui atanga kaihhruai tur hian dah a ni.