Aizawl: Education Minister Dr. Vanlalthlana chuan nimin khan Govt. Zirtiri Residential College Building, Ramhlun South-ah Commerce & Industries (C&I) Department leh Ministry of Textiles hnuaia Weavers’ Service Centre (WSC), Aizawl-te buatsaih, National Handloom Day vawi 11-na lawmna chu khuallian niin a hmanpui.
National Handloom Day lawmna inkhawmah khuallian Dr Vanlalthlana chuan, Mizo puan design chu a danglam bik riau avang leh hnam dangte mawi tihzawng a nih avangin, ram pawna thawnchhuah a nih theih chuan a hnam ang leh a tahtute tan hlawkna a ni dawn a. Amaherawhchu, thawnchhuah dawn chuan international standard, export quality thaa tah a ngai dawn a, chu chuan puantahte nasa zawka tan la thar tura a chawh phur a beisei thu a sawi.
Minister chuan puantahte chu a zuartute nena thlunzawm an ngaih thu a sawi a. Hralhna tur rintlak a awm chuan, eizawnna ngelnghet an nei thei dawn tih sawiin, puantahte chu theihtawp chhuaha sorkar atanga an tanpuina dawnte pawh pelhe lova hmang turin a chah.
Dr Vanlalthlana hian puantah mi 30 tana ni 45 chhung Samarth Training neih tur hawng nghalin, veteran weaver-te hnenah chawimawina a hlan bakah puantah mi 21 hnenah National Handloom Development Programme hnuaia puantahna hmun sakna tur sumfai a hlan nghal bawk.
National Handloom Day hi kum tin August ni 4-ah India ram pumpuiah, Swadeshi Movement hriatreng nan puantahtute ni atan hman thin niin, ram mipuite chu tualchher thil leh puante hmang uar tura inzirtirna atana hman a ni.
A lawmna hun pui ber chu Bharat Mandapam-ah India president chu khuallian niin an hmang a. Commerce & Industries Department chuan Mizoram aiawha he programme chhim tur hian Mizoram hmun hrang hranga mi puantah mi panga a tir a. Sorkar laipuiin a lawmna pakhat atan a buatsaih, ‘Exclusive Handloom Expo,’ Handloom Haat, Janpath, New Delhi-a neihah Mizoram aiawhin Lapar leh Fungki-te an inphochhuak bawk.