Aizawl: P&E department chuan Mizorama smart meter vuah/thlak hna kalpui mekah, meter thlakna man pek a ngaih loh thu leh ID card nei lo meter thlak tum an awm chuan hriattir vat turin mipui an chah.
Electric Energy Meter hmanlai mek chu Pre-paid leh Post paid atana hman kawp theih, smart meter-a thlak vek tur a nih angin Mizoramah pawh smart meter vuah hna hi thawh tan a ni a, hemi chung changah P&E department chuan, meter thlak tura lo kalte hian ID Card an nei nge tura tih a nih angin, ID Card nei lo meter thlak tum an awm chuan P&E Department office ah hriattir vat turin an ngen.
Meter thlak man hi mipuiten an pek a ngai lo a, meter thlak man dil an awm a nih chuan a rang lama hriattir turin an chah bawk.
Hei bakah, meter thlak tute hian meter thlak chauh hi an hna anih avangin, consumer-te electric wiring an khawih danglam sak ve ngawt a thiang lo va, electric wiring khawih danglam duh tan electric wiring ti thei a hrana chhawr tur a nih thu an sawi.
Smart meter hi sang lutuk emaw hniam lutuk emaw ah vuahtir lovin, a theih chuan mit zawn (eye level) ah lo vuah tir turin mipui an ngen bawk.
Meter thlak hna tluang taka a kal theih nan leh Consumer No leh Consumer hming dik taka chhinchhiah a nih theih nan meter thlaktu te hnenah electric bill hlui/thar lo hmuhtir ni se, electric bill hmuhtir tur an kawl tha tawh lo a nih pawhin PEDM Consumer application atangin a download theih reng tih an tar lang.