Zoram Medical College & Hospital (ZMC&H), Falkawn chuan nimin khan an din cham vawi sarihna, 7th Founding Day lawmna hun an hmang a. Health Minister Lalrinpuii chuan khuallian niin hun a hmanpui a, khum 60 awmna intern hostel a hawng nghal.
Hawnna inkhawmah Health Minister chuan thingtlang mipuite thleng phak healthcare service a ngaih pawimawh thu sawiin, Mizo mipuite tana ZMC&H hlu tih a sawi a. Tun hnaiah hmasawnna tam tak hmuh a ni chu lawmawm a tih thu a sawi.
A hun leh ngaihtuahna zawng zawng Hospital hmasawn nana a sen thin thu a sawiin Lalrinpuii chuan, India rama institution tha ber ber atanga zir chhuak thawktu ZMC&H in an nei chu lawmawm a tih thu sawi a. Zirlaite chu Mizorama Cancer hluarna chhante leh natna dangte pawh zirchiang a, tihtak zeta bei turin a fuih bawk.
Hemi hnu hian Health Minister hian MBBS Intern Hostel sak thar, khum 60 awmna Charles Robert Darwin Hostel tia vuah chu a hawng a ni.
ZMC&H Founding Day lawmna inkhawm hi Dr. Lalthlengliani, Principal Director, H&FW in a kaihruai a. ZMC&H Director, Dr. John Zohmingthanga pawhin thu a sawi a. Er. C. Lalenkawla, Sr. Executive Engineer, Project Division-II, PWD-in Intern Hostel sak dan report a pe bawk.
Tun dinhmunah ZMC&H-ah hian MBBS zirlai 394 awm mekin, Internship ti mek 98 an awm a, Batch hnih (2018 & 2019 Batch) atangin MBBS zir chhuak 189 awm tawhin, MBBS zirlai atang hian National Level Essay Writing Competition on Family Adoption Programme-ah lawmman dawng pawh mi pahnih an awm tawh a, National Level Quiz-ah te pawh lawmman an lo dawng tawh bawk a ni.