North Korean sorkar chuan air defence missile pahnih an enchhin a, an ram hruaitu, Kim Jong Un-a pawhin a enpui niin an sawi.
Korean Central News Agency (KCNA) chuan ralthuam enchhin hi ‘indonaa mi beih nana mi chungchuang’ tia sawiin ‘technology danglam tak hmang’ an ti a, an sawi thui lo.
Inrinni khan enchhin a ni a, ‘van sanga a tum chi hrang hrang tha taka bitum hmak tham thei chi nih’ tia tar langin drone leh cruise missile pawh a kap thla thei tih KCNA hian a tar lang.
Ralthuam enchhin a nih hma lawk, Thawhlehni khan South Korea chuan an inrina, Demilitarised Zone (DMZ) an tih kântu North Korean sipaite tihthaih nan silai an hmet puak tih an puan hnu lawkah a ni.
United Nations Command chuan North Korean sipai 30-in chhim leh hmar thenna nasa taka ven hi an kân niin a sawi tih Yonhap News Agency chuan a tar lang.
Pyongyang chuan Seoul hian ‘boruak a tisosang’ niin a puh.
South Korea leh US chuan Thawhtanni khan sipai nunchan an zir mek bawk.
US President Donald Trump-a chuan Thawhtanni hian South Korean President Lee Jae Myung-a chu Washington-ah a hmu dawn bawk.
South Korean president thlan thar hi Korean ram hnih inkungkaihna tha a awm theih duhtu a ni.
Hetih lai hian Kim-a farnu, Lee-a sorkar duh dan chu na takin a sawisel thung a. Kim-a hian a hmain US leh South Korea sipaiten nunchan an zirho chu a dem thu a sawi bawk.
North Korean hruaitu hian nuclear ralthuam siam lama nasa zawka tan lak a tum bawk.
January hian North Korea hian intermediate-range ballistic missile, ralthuam tha ber bera thuam pawh enchhin a tum nia sawi a ni.
South Korean thuneitute chuan North Korea hian Ukraine indonaa sipai a thawn rulh nan Russian missile technology pek an ni tih an lo sawi tawh thin.
South Korean president hlui, Yoon Suk Yeol-a national security adviser thin, Shin Wonsik-a chuan nikum khan Seoul hian Moscow-in Pyongyang hnenah hian vansanga indonaa hman tur missile leh hmanraw dang a pe niin a lo sawi tawh a ni.
Inrinnia ralthuam enchhinah erawh Russian technology a inhnamhnawih em tih erawh hriat a ni lo.
North Korea hi khawvela mi pakhat rorelna ram langsar ber niin Kim-a leh an chhungkua hian rei tak ro an rel tawh.
South leh North Korea hi kum 1953-a Korean War atang khan a inthen a. Inremna ziah chiah a awm lo va, silai erawh an hmet puak tawh lem lo.