Tunlai Mizoram mipui tam ber titi leh media lama kan hmuh tam ber FCAA chungchangah inhnialna a nasa hle a. Tam takin kan ram tana dan hlauhawm leh dan sakei tia an lo sawi kha a ni a. Mahse, dan hlauhawm, mizo mipui himna tichhe vektu nia sawitu ten a lo hlauhawm love an tih leh tak avangin inhnialna nasa tak a thleng ta a ni.
Kan hriat theuh angin 1986 khan Mizoram hi India ram a ni love titute leh India sawrkar chuan inremna an lo ziak a. Kha inremna ziak anih dawn khan Mizo aiawhte chuan India ram kan nih dawn chuan mihring tam em em mai vaiho chu an duh duh in an lo lut ang a. Keini aiin an hausa a, an duh duhnaah ram an lei ang a. India sawrkar lahin a duh duhna laiah hma a rawn la hmiah hmiah ang a. Chutiang anih chuan keini Mizo hnam tlem te chu reiloteah chim ralin kan awm thuai ang tiin kan hnam leh ram invenna/inhumhim bikna chu an inremnaah chuan an lo ziak tel ta a. Chu dan ang chuan India Constitution Article 371 G ah chuan kan hnam thil bik leh ram neitu nih chungchangah India sawrkarin dan a neih te chu Mizoram sawrkar assembly in a pawm anih loh chuan Mizoramah a hman theih loh ang tih a ni.
Mahse, hun a lokal zel a. Vawiinah chuan kan ram hruaitute chuan he inremna dana a pawimawh lai Article 371 G chu bawhchhiain, kan ram tan helai bung leh chang te hi kan ram hmasawnna daltu mai a ni a. Chuvangin he FCAA hi kan rama hman theih ve turin i pawm ang u an ti ta thut mai a. Mipui min barakhaih hle a ni. Mipui pawh kan inring hman lova. Mipui aiawh a thu opposition MLA te pawh hriattir lawk an nih loh avangin an inring hman bik hek lo. Assembly a pawm anih rual rualin kan buai phili ta hlawm a ni.
He dan hi India sawrkarin kan ramah a hmang duh anih chuan an duhna lai laiah kawngpui sial, thlawhna tumhmun siam, sipai hmunpui bun kha an duh hun hunah an ti thei tawh dawn a. Kan ram mipui leh sawrkarin sawi theih kan nei tawh lova. Kan ram chhungah India sawrkarin India himna chhuanlam in an duh leh sumdawng company pawh defence chhuanlam in an rawn hung thei tawh dawn a ni. Chuvangin he kan rama thuneihna kan lo neih ve thin chu chhuhsakin kan awm dawn tawh a ni.
Mizote hi India nawlpui lakah hian hnam hrang hlak kan ni a. India nen hian inzawmna leh inkungkaihna pakhat mah kan nei lova. Indian history ah hian Mizo hnam chungchang pakhat mah a awm lova. Mizo thawnthu hi han bihchiang ngial mah ila India nawlpui a kan telna pakhatahmah a awm bawk lova. Mahse, kan mawl zawk vang leh chak loh zawk avanga India a bet ve ta mai kan ni a. Chutiang anih avang chuan India sawrkar leh kan hotute inbiak lai khan kan hnam tana thil ngaihtuah chiang em em an ni. Inhumhalh bikna pawh hi an lo dah ta a ni. Chuvangin vawiin a kan inhumhalhna dan chungchang nghawng khawih a lo nih takah hian kan phu ta suau mai a ni.
He dan kan hotuten an lo pawm mai hi thil pawi a ni a. Chuvangin Mizo mipuite himna chungchangah hian kan sawrkar hian a thu lo dah tawh hi a rang lamin hnuk kir se tih hi mipui duh dan ber niin a lang.