Pakistan-a tui lian nasa tak chu mi maktaduai li velin an tuar mek a, an thenawma India-ah pawh lo neitu tam takin an thlai an chân a. Sik leh sa inthlak nasain ram pahnihah hian fur a tina hle niin an ngai.
Chawlhkar liam ta chhung khan Pakistan-a mihring chen an tamna ber, Punjab province-ah chuan ruah a sur nasa hle a, lui lian pathumte an kuang luang liamin an rama lo neihna hmun pawimawh berah hian chhiatna a thleng nasa hle.
Pathianni tlai thleng khan khaw tam tak chu tuiin a la chim vek a, thlai tam tak a chhia a, sorkar pawhin chhawmdawlna pek tuin ruahmanna a siam mek.
Pakistan Markazi Muslim League thupuangtu, Mohammed Ajmal-a chuan tui lianin a tihchhiatte hi ‘mitthla phak bak’ a nih thu Al Jazeera a hrilh.
“Kan party chu chhun zan zawmin ram pumah a mamawhtute puiin kan thawk chhuak a. He chhiatna hi sorkar tan chauh chuan lo hmachhawn hneh rual a ni lo,” a ti.
Hetih lai hian Inrinni khan tui lian avanga tangkhangte chhanchhuah hna thawktu lawngleng chu a hna a thawhna lamah letin pitar kum 70 mi leh naupang pali an thi a, thuneituten Pathianni khan thi hi finfiah an ni tawh tih a puang.
“Mi 10 chu chhanchhuah theih an ni a, vanduaithlak takin mi pali erawh he chetsualna thlengah hian an thi a ni,” tiin Provincial Disaster Management Authority Director General Irfan Ali Kathia chuan tual chhung chanchinbute a hrilh.
Punjab Relief Commissioner Nabil Javed chuan Ravi, Sutlej leh Chenab lui lian avang hian mi maktaduai hnih velin an in chhuahsanin an insaseng niin a sawi.
Pakistani thuneitute chuan relief camp za tel siamin damdawi thiam leh ran enkawl thiamte a tir a, mihring leh ran vulhte enkawl an ni.
June thla atang khan Pakistan-ah hian fur ruah sur nasa kaihhnawiha chhiatna hrang hrang thlengah mi 900 chuang an thi tawh niin UN chuan a sawi.