Tunkar tawp lamah India prime minister Narendra Modi chuan rel kawng chu Sairangah a rawn hawng dawn a. Kan ram history thil thleng lian tham kumkhuaa chhinchhiah tlak a lo thleng dawn a. A thawktute leh kan sawrkar hotute pawh an inpuahchah nasa hle. Kan ram hmasawnna kawngah he rel kawng thar hian nasa takin nghawng a rawn nei dawn a ni.
Rel lo thleng tur hian nasa takin kan ram nunphung a rawn khawih danglam dawn a. Chhunah chauh zinchhuah tur emaw ti tlat Mizote chu zanlaia kan zinchhuahte, zanlaia kan zin haw hunte a awm tawh dawn a. Kan hun hman dan thimhlima activities zawng zawng chawl nghal vek zel hi a rawn tidanglam nasa dawn a ni.
A bik takin chhunah chauh kan taxi service te hi zanah pawh an service a ngaih hun a tam em em dawn a. Motor lian pawh chhunah chauh ni lovin, zanah bungrua an load in an rawn phurh haw a ngai tawh dawn. Kan hotel te chu zanlaiah pawh mikhual lo thleng thut thei lo dawngsawng tura an inpuahchah a ngai tawh ang. Sairang kawng chu a lun dawn em avangin chhun leh zan awm mang loh chang pawh a tam dawn. Thlawhna chuan kher loha rawn zin zung zung theih anih tawh dawn avangin vaiho pawh an lo lut ram lehzual ngei ang. Tourist pawh kan ngah sawt hmel e. Kawngkam dawrte pawh hian vai ei duhzawng an zawrh ve a ngai ang. Chumi an tih loh chuan vaiin dawr / kawngkam hotel an siam ang a. Rel lo lut zar zotu chu vai bawk an nih leh chuan a pawi ang.
Hetiang karah hian engangin nge kan sorkar a lo inrin ve ang tih hi lo ngaihtuah fim a ngai a. Rel a mikhual lo thleng tam tak hian kan ILP system hi an hre vek lo ang. Hei hi kan puanzar nasat a ngai dawn. An lo thlen tawh hnua inhrilh hriat chawp hi a buaithlak thin.
Rel lokal hian hmasawnna tam tak a rawn thlen rualin thil tha lote pawh a rawn keng lo thei lova. A pawimawh ber chu keimahni lam inpuahchahna hi a ni reng dawn a ni.