Aizawl: School Education Department Minister Dr. Vanlalthlana chuan Thawhtanni khan New Delhi-a International Literacy Day, 2025 hmanna chhimin Mizorama 100% ziak leh chhiar thiam an awm chhan chu tanrualna zar a nih thu a sawi.
Minister chuan Mizoramin ziak leh chhiara bul a tan dante sawiin hawrawp neih chhan leh ziak leh chhiar an thiam chhan chu British lal hun laia Kristian missionary-te vang a nih thu a sawi a. Inzirtir chhawng zelin India-in independence a neih hnuah ziak leh chhiar thiam pun theihna pawimawh tak, Adult Education Wing a din thu a sawi a. Hei hian New India Literacy Programme (NILP) tan hma nasa tak lain kum 2022-23 khan 96.41% lai literacy rate a neih theih tak thu a sawi.
Hmalakna hrang hrang zarah hian MoSPI hnuaia Periodic Labour Survey Force Annual Report chuan July, 2023-June, 2024 chhung khan Mizorama awm kum sarih chung lam ziak leh chhiar thiam zawng zawng chu 98.2% an nih thu a puang a. Hei vang hian ULLAS chuan May 20, 2025 khan Mizoram chu India rama a hmasa ber atan fully literate state-ah an puan tak thu a sawi a ni.
Minister chuan he hun an thlen theih chhan chu state leh central sorkar an thawhhona that vang te, kohhran, NGO, civil society leh education department tanrualna rah a nih thu sawiin hei maiah duhtawk lovin zirna, a bikin skill development lamah hma sawn zel tura tan kan lak a tul thu a sawi a. India chu ziak leh chhiar thiam vekna ramah siam turin Mizoram chuan sorkar laipui chu puih a inpeih reng thu a sawi.