Hman laia America a lo awm hmasa hnam huaisen leh kawlh Red Indian te chu an thawnthu bak kan hre ta meuh lo. Hnam fing leh hmasawn zawk European hovin an luh chilh a, an ral tih kan hre vek a. An chan chu history leh thawnthu ngaihnawm chauh a ni ta. Red Indian te hian an theih tawpin bei let mahsela an ral tho tho. Mingo hovin an ram chu kawng hrang hrangin an bei a. An lal thenkhat chu hmasawnna chhuanlamin an thlemin an bum a. A then chu sum hmachhuanin an ram an lei sak a. A then chu dan siamchawpin an lak sak a. A ruh zual chu tharumin an nek a. An tan chet ngaihna awm lovin an nek ral ta a ni.
India ram ngei pawh British hovin sumdawng company hmangin zawi zawiin an rawn luh chilh a. Tharum hmangin an bei tel a. Lal engemaw zat chu inremna siampuiin an ram an neih sak a. India chu Bristish colony a lo ni ta a nih kha. Kum 200 dawn awpbeh anih hnuah India mipui pawh lo harhin thisen tam tak sengin anmahni ram ngei chu an nei let leh thei hram.
Tunhnai lawkah kan bul hnai Assam ah Dimasa tribal te chu Assam a BJP kaihhruai sorkar chuan an ram chu an hriat loh hlanin India sumdawng company lian pakhat Adhani group kutah a lo hlan hmiah mai. Adhani company hian Asia rama cement factory lian ber helaiah hian din an tum a ni. Dima hasao mipuite an lungawi lo em em a. Assam chief minister Himanta Biswas Sharma erawhin helai bial changkanna atana hmalakna anih thu a puang hmiah thung. Adhani hnena ram hlanna hi a ruk thei ang berin file kal tir a ni a. Rang takin sorkar a che zung zung a. An hriat meuh chuan sorkar thupuan in a zui a ni. Engtinnge boruak a kal zel dawn hriat a ni lo.
Kan ramah inhumhalh bikna dan article 371 G kan nei tia thlamuang taka kan awm laiin kan sorkar chuan chu kan dan hlih thenna chu kan MLA te pawh hrilh chiang hmasa lovin kan assembly house ah a pass pui thut mai a. Kan buai zo ta. Engtinnge kan awm tak ang?
Kan pi leh pute hun lai chuan ramhnuaia sakhi huk dap dap pawh kan lal ten ka ta an ti a. Chung lama muvanlai thlawk pawh an ta a ni. He khawvel ram zauah hian tuma chuh buai theih an ni lo. Thuneihna pumhlum an nei a. Tunah erawh Red Indian ho ral tur ang khan kan hotu lamah pawn lam atangin development chhuanlamin duh duha hmalak phalna an nei ta. He ramah hian kan thuneihna chu a tlem em em tawh a. Kan hotuten development an atchilh a. Chumi atan chuan kan hnam chu min neksawr hret hret a. Inti Mizo em em hian ral lam kan va pan nasa em. Hmasawnna nge pawimawh hnam kalzel dan tur i ngaihtuah chiang ang u. Hnama min siamtu Pathian hi hre reng ila, keimahni duhthlanna thiang taka kan ral loh nan finna thar pawh i dil ang u.