Manipur-a Churachandpur-ah tleirawl tete telin mi eng emaw zat chuan vantlang thil suasama puh avanga an thiante man chhuah nawr nan Pathianni khan venhim hna thawktute nen an intibuai a, lungin an intawng nasa hle.
Prime Minister Narendra Modi-a’n Inrinnia a tlawh hma ni hnihah khan Kuki chenna Manipur chhim lam, Imphal atanga km 65 vela hlaah mipa pahnih hi vantlang thil an suasam nia puhin man an ni.
He thil hi Phailien leh Pearsonsonmun-a thleng niin a hmun hi Kuki, Zomi leh Hmar hnam MLA leh hel pawlten sorkar laipui nena inbiaa inawpna hran siamsak an phuta an duh ang an tihsak lohna hmun a ni.
Pathianni khan thalai eng emaw zatin mi an man an dahna police station chu an hual a, chhuah an phut a. Boruak tang zelin venhim hna thawktute hi lungin an tawng ta niin police chuan an sawi.
Police-in video an tihchhuahah chuan rawltharte hian tawngkam mawi lo tak takin venhim hna thawktute hi an ko va. Video pakhatah chuan venhim hna thawktu pathumin kawtthler chep taka lunga vawmtu thahnem tak an nawr lai a lang a. An dinhmun a chhiat zawk avangin insasengin an tlanchhe zui tih a lang.
Nepal-a tun hnaia mipui lungawi loten ‘Gen Z’ tia an invuah atanga invuah ve ni ngeia ngaih theihin WhatsApp group hrang hrang, Zomi hnam awmnaah mi an man avanga lungawi lohna hi a ri nasa hle.
Police officer pakhat chuan mipuite hnenah hian mi an mante chu an hreng a, an chhuah leh mai a. Tun tuma an mi mante erawh vantlang thil an khawih vanga man an nih piah lamah thil tha lo tak an ruahman avanga man an ni a, an kawl rei tih a hrilh.
“Dan anga thil kalpui turin kan ngen cheu va, engmah dik loh kan hmuh loh chuan an lo chhuak leh dawn a ni,” a ti.
Pathianni zan khan chhuah an ni zui ta bawk.
Prime Minister Modi-a’n Manipur hi Meitei-Kuki inkara kum 2023-a buaina a chhuah hnua a vawi khat nan a tlawh a. Churachandpur tlawh hmasain vantlang inkhawma hun a hman hnuah Imphal a tlawh leh a, hetah pawh hian thu a sawi.
Modi-a hian mipuite chu muanna siam tura ngenin Manipur chu thanna leh hmasawnna entirtua tantir turin a ngen a. Churachandpur-ah hian Rs. vaibelchhe 7,300 senga hmasawnna ruhrel dinna tur lung a phum a, Imphal-ah hian Rs. vaibelchhe 1,200 man hna thawh zawh tawhte a hawng bawk.