Sports, culture leh awareness campain hmanga thalaite a tha lama kahhruaina kalpui thin, WATO Trust chuan basketball tournament an buatsaih turah Mizoram Territorial Army an la nghal dawn.
WATO Trust chuan October 17 khian Aizawlah Basketball tournament an buatsaih dawn a, hetah hian Assam Rifles te chuan Mizoram Territorial Army an la nghal dawn niin, Ningania Aizawl Press Club-a thu thar thehdarhtute an kawmnaah an sawi.
WATO Trust Founder leh President Dr. Yogita chuan mihringte zalen taka nun hona neih theihna tura hmalak chu an thupui ber a nih thu a sawi a. Thalaite ruihhlo laka an fihlim theihna turin hma an la a, Narco-Free Mizoram siam an tum, thalaite chu rilru hrisel, nun awmze nei leh kawhhmutu tha an nih theihna turin hmalak an tum thu a sawi.
Basketball tournament an buatsaih tur hi 3X3 a ni dawn tih sawiin, Under 21 leh Senior-ah te neih a ni dawn a, Falkland Park-ah buatsaih tum a ni a, a rem loh chuan Dawrpui Basketball Court-ah neih a ni ang.
Tel tum te chuan WATO Trust Business Strategist Asomi number 8794571126-ah registration tih theih a ni. Lawmman tha tak siam a ni dawn bawk.
He intisiakna a khel tha pathum te chu kum khat chhung scholarship pek an ni ang.
He tournament hi Mizoram Territorial Army lakna hun atana hman a ni dawn a, Narco-Free Awareness neih a ni dawn a, Mizoram-ah hian drugs-free youth community din tura hmalakna neih nghal an tum bawk.
October 18, 2025 zan hian Rajiv Gandhi Stadium-ah Exhibition Match an buatsaih dawn bawk a, infiamna leh mite hriat lar mi 30-ten tunah hian an tel theih tur an tichiang tawh. He inkhelah hian halftime show neih tur a ni a, tualchhung zaithiam te an zai dawn a ni. Heng infiammi mi langsarte hian ruihhlo that lohzia zirtirna hun an nei bawk ang. He hun hi Mizoram Larsap General V.K. Singh hova hman a ni dawn a ni.
WATO Trust te hian Mizoram sorkarah hian Sports Department, Excise & Narcotics Department leh Social Welfare Department te an thawhpui bakah Mizoram Basketball Association & Mizoram Football Association, Assam Rifles leh Sports Authority of India te an thawhpui bawk.