Indian rupee chuan Thawhlehni khan a hniam lai ber a tawng a, hei hi US-in tariff sang tak a laksak leh H-1B visa fee a tihsan vak lai nen innang chiahin central bank chuan hloh a awm zel loh nan hma a lak ngei rin a ni.
A hniam lai berin Rs. 88.7975 leh US dollar khat a intluk tawk a, ni a liam erawh chuan Rs. 88.7550 a ni leh hman a, 0.5%-a tlahniam thovin thla khat dawn hnua vawi khata a hniam tam berna a ni.
Hetianga Indian rupee hlutna a tlakhniam mek lai hian H-1B visa fee chu nasa takin US-in a tisang a, hei hi India-in IT sector atanga sum a lak luh thin tam tak nghawng thei tura ngaih a ni a. A bungrua a lak luhah US hian chhiah 50% laksak mek zel bawkin Asia-a a laksak tam ber ram a ni.
HSBC-a economist-te chuan US-a Indian hna thawk awm maktaduai 5.4 velin kum tin an ramah $ tluklehdingawn 33 an hawn thin niin an sawi.
Kum tin visa dil thar 80,000 chuang an awm ziah a, heng mite hian an dil hi an hmu lo a nih chuan India-a sum an hawn thin zinga $ maktaduai 500 vel chu phai phah ngei turin an chhut lawk.
India-a benchmark equity index, BSE Sensex leh Nifty 50 te chu an danglam lutuk lo thung a; mahse, IT stock erawh 0.7%-a tlahniamin kum khat chuang chhungin 18% chuangin an tlahniam tawh.
Indian rupee hlutna hniam zelah hian central bank a inrawlh ngei tura ngaih a ni a, hetih lai hian sumdawng liante chuan zawi tetea India pawisa hlutna tlahniam hi bank pawhin an lo chhut lawk a nih thu an sawi ve thung.
“Rupee dinhmun hi pawn lam nena inkungkaihna thil avanga che a nih rualin tual chhunga thil vir vel mek, entir nan tun hnaia chhiah lak zat bi hniam te leh sumdawnna thil che velin a siam a ni ve bawk,” tiin HDFC Securities-a foreign exchange research analyst Dilip Parmar chuan a sawi a, a ziaawm leh theih a beiseiawm tih as awi bawk.