Aizawl: Zoram Thar hruaitute chuan Mizoram State Assembly Speaker Lalbiakzama hnenah hnam nihna (national identity) Zofate a nih thu Session sawiho tura chhawp chhuak tura ngenna an theh lut.
Zoram Thar hruaitu Zaichhawna Hlawndo chuan Assembly Speaker hnena an lehkha thehluh chu hnam tobul an chhui chhuah atangin an thlahtu Zo, Zova, Yo leh Jo niin, pi leh puten an lo sawi thin Bible a Jakoba (Israela) fapa Zosefa kha a ni a. Zo hnahthlak intite hi Zosefa fapa pahnih – Ephraim leh Manesia thlah kal zel Zofate an nih thu Ningania thu thar thehdarhtute an kawmnaah a sawi.
Aizawl Press Club-a an kawmnaah lehkha an thehluhah Zoram Thar hruaitute hian hnam nihna sawifiahna United Nation-ah te, India leh Israel Prime Minister hnenah leh khawvel ram veto power nei – USA, UK, France, Russia hruaitute hnenah an thehluh tawh thute an ziak tel tih an sawi bawk.
An sawi zel danin, December 17, 2021-ah Zofate hnam lungphun Thenzawlah hawn a nih tawh thu te, he hnam lungphunah hian Zo hnahthlak Zofate chi hming zawng zawk ziah vek a nih tawh thute an ziak tel. He hnam lungphunah hi hnam peng aiawh theuh ten an hawng a, pawl hrang hrang aiawhte nen innlungrualin Hnam Nihna Thuthlung (National Identity Referendum) siamin a nemngheh nan hming an lo ziah tawh thute an thlen tel bawk.
Zoram Thar hruaitute chuan, “Zofate hi kan bona a rei tawh avangin kan hnam nihna dik tak pu tawh lovin hnam hrang angin kum tam tak kan lo awm tawh a. Mahni ramah cheng mah ila hnam dangte rorelna India, Myanmar leh Bangladesh hnuaiah kan la awm rih a ni. Thlahtu bul thuhmun, hnam khat vek si kha hnam hrang anga chhinchhiah kan ni. India Constitution Article 366 (25), Article 342 leh Article 744-ah te chuan Assam, Meghalaya, Mizoram, Nagaland, Tripura leh Manipur-ah Zo hnahthlak Zofate chu hnam (tribe) hrang 25 – Mizo, Hmar, Pawi, Lakher, Kuki, Lushai, Paihte, Gangte, Vaiphei, Thadou, Halam, Anal, Chiru, Chothe, Ralte, Simte, Kabui, Koireng, Kom, Maring, Monsang, Purum, Simte, Aimol leh Zou ti a ziah kan ni,” an ti.