Spanish footballer ropui, Sergio Busquets chuan Major League Soccer (MLS) season kal mek a zawh rualin football khelh a chawlhsan tur thu a puang.
Barcelona midfielder hlui, kum 37 mi hi MLS club Inter Miami-ah a khel mek a. Spain tan vawi 143 a inlan a, 2010 World Cup leh 2012 European Championships-ah an ram hi a champion-pui nghe nghe.
Busquets hi Barcelona goalkeeper thin, Carlos Busquets fapa a ni a, kum 2008 khan Pep Guardiola hnuaiah a vawi khatna atan Barcelona first team-ah a inlan tan a. A vanglaiin Barca tan vawi 722 a khel hman a, La Liga nomawi vawi kua a lakpui bakah Copa del Rey vawi sarih leh UEFA Champions League nomawi vawi thum a lakpui hman a ni.
Zirtawpni kal ta khan Busquets hian social media-ah chawlh a tum thu hi a puang a, “In zavaia chungah leh football chungah hian ka lawm em em a. Ka zinkawng hlimawm takah hian engtik lai pawhin in tel ve reng dawn a, ka thil tawn engkim avang khan lawmthu ka sawi tak meuh meuh a ni,” a ti.
July, 2023 khan Inter Miami a zawm a, hetah hian Barcelona lama a khelhpui thin, Lionel Messi leh Jordi Alba te nen an khelho a. 2023 Leagues Cup-ah an champion a, Inter Miami-in nomawi an lak hmasa ber a ni.
Kum 2024 pawh khan Supporter’s Shield a lakpui leh a, inkhel hnem ber niin hetiang dinhmun thleng thei tura pawimawh a ni.