Aizawl: Traffic Warden atana training chhuakte hnenah nimin khan Traffic SP Ruatsanga Ralte-in certificate a hlan.
Certificate hlanna inkhawm hi Traffic Roll Call ground, Control Room-ah neih niin, tun tumah hian training chhuak mi 23 an awm a ni.
Certificate hlanna inkhawmah Traffic SP, Aizawl Ruatsanga Ralte chuan training chhuak a lawmpui thu sawiin; an tana an hotute thahnem ngaihna hre reng turin a chah a. Khawvel thang zelah programme chi hrang hrang buatsaih thin a ni a, chumiin a ken tel traffic enkawlna hna thawk thei tura inzir chhuakte chu an duty hlenchhuahna kawngah theihtawp chhuah turin a fuih.
Inkhawm kaihruaitu Traffis Addl SP, Aizawl Sarah Lalrinkimi chuan kum 2017 atangin Mizoramah Traffic Warden Scheme kalpui tan a nih thu a sawi a. Traffic Warden-te tana hamthatna nasa zawk a awm theih nan Aizawl City Traffic Warden Scheme 2017 chu ennawn mek a nih thu a sawi a, Traffic Warden atana training chhuakte chu dan kenkawhna kawnga Police-te puitu tangkai tak ni turin a chah bawk.
Dy. SP, Traffic Vanlalbiaka Joute sawi danin, tun tumah hian a tirah mi 27-in training zawmin, certificate hlan theih tura training chhuak chu mi 23 an ni a. Training-ah hian traffic signal hrang hrang leh traffic enkawl dante an inzirtir a ni.