Aizawl: Mizoram Chief Electoral Officer Dr Lalrozama chuan Dampa bial by-election neih turah inthlanna thianghlim, dik leh langtlang kalpui a nih theihna’n Election Commission of India thuchhuak ngai pawimawh turin political party hrang hrangte a chah.
Ningani chawhma khan MINECO-a CEO office-ah Dampa bial by-election neih tura inbuatsaihna kalpui dan chungchangah political party hrang hrang aiawhte chu Mizoram CEO Dr Lalrozama’n kawmin, inthlanna neih turah vote thlak nana hman tur EVM khawlte pawh endik zel a nih thu leh web-casting nei thei turin polling station pawh buatsaih mek a nih thu a sawi a. By-election kalpui tura inbuatsaihna kal zelah political party hrang hrang atangin CEO office hmalaknain thlawpna tha tak an hmuh thin thu a sawi.
Dr Lalrozama chuan Mizoram chu state dangte tana entawn tlak ni turin inthlanna felfai, langtlang leh thianghlim kalpuina kawngah political party hrang hrangte chu thawhhopuiah a sawm bakah, Election Commission of India thuchhuak ngai pawimawh turin leh Model Code of Conduct zawm zel turin a chah bawk.
Nimin vek khan CEO Dr Lalrozama’n a piasa-ah Dampa bial by-election neih tur atan MPF, Cental YMA, MUP, MHIP, MKHC aiawhte a kawm bawk.