Aizawl: October ni 21-23, 2025-a Sakawrdaia YMA Khawmpui Lian neih tur atana inbuatsaih nan PWD Minister Vanlalhlana’n NH-306A dinhmun nimin khan a enfiah.
NH 306A hi Mizoram hmar lam, Kolasib leh Mamit district mipui tan Sakawrdai pan theihna tur kawng niin, kutcha road (la metal loh) a ni a. Nuam zawk leh him zawka helai kawnga an tlan theihna turin PWD chuan thawmthat hna an thawk mek a, khua a that a, ruah a sur nasat loh chuan lirtheite pawh tha taka an tlan theih tur thu leh chutiang tur chuan chak taka hma lak a nih thu PWD Minister chuan a sawi.
Motor tang palh a awm a nih pawha vil turin JCB pathum dah a nih tur thu a sawi bawk.
PWD Minister hian nimin vek khan Tuirial Hydro Power Station a tlawh nghal a, NEEPCO hotuten an lo dawngsawng a ni.