Guwahati atanga rel ticket Sairang thlenga a full reng laia ILP pekchhuah tlem lutuk chu MZP-in mak an tih thu an sawi a, ILP nei lova bibo tam tak an awm tih chiang takin a lantir nia an ngaih thu an sawi.
MZP hruaitute hian Ningani khan thuthar lakhawmtute kawmin tun hnaia rel station hawn thar, Sairang an tlawha an thil hmuh leh awm dante an sawi.
Station an tlawh lai hian ILP nei loa a ruka chhuah tum mi 30 vel an man chhuah thu an sawi.
Rel station hawn a nih tuk, September 14, 2025 atanga October 7, 2025 thleng khan ILP 3,852 pek chhuah tawh a nih thu leh kutdawh thawn kir paruk an awm tawh thu an sawi a. Ni khat chhunga ILP pek chhuah tam ber tumin 360 leh tlem ber tumin 46 pek an ni tih an sawi.
MZP hruaitute chuan Bairabi leh Sairang inkara station – Hortoki, Kawnpui leh Mualkhangah pawh rel a tlan muang deuh nia sawi awmin tam tak an chhuk nia hriat a nih thu an sawi a. Heng hmunah hian police duty awm ve mah se tam tak chu ILP nei loin an chhuak ngei ang tih an ring tih an sawi.
Mizorama hnam dang lutte chu tourist ang veka ILP pek an ni a, an lut lam chhinchhiah ni mah se an haw lam chhinchhiah a ni lo va, hei hi awlsam taka luhna atan mi tam takin an hmang dawn tih a chiang a, cham hlen ta pawh tam tak an awm dawn tih a chiang hle tih an sawi.
MZP hian Sairang thlenga rel lut tur chungchanga an hmalak tawhna tar langin seminar leh talk show pawh an lo buatsaih tawh tih an sawi a, An pawl rorelna sang, Federal Council vawi 57-na, April 11, 2024-a thukhawm pawhin, “Sairang thlenga rel a lo luh dawn avangin sorkarin Inner Line Permit (ILP) check dan turah ruahmanna fel fai zawk a siam theih nan MZP-in hma la rawh se,” tia lo rel tawh bawhzuiin April 29, 2024-ah Chief Minister Lalduhoma hnenah ILP chungchang rawtna an thlen tih an sawi.
Rel lut hi MZP chuan a zirchianah hnawhsarum takin India sorkarin station a hawng a, a nihna tur ang la ni lo tih hre reng chungin prime minister hawntir a ni a, hei bakah hian Mizoram sorkar la inpeih lohzia pawh chiang takin an hmu tih an sawi a, “Hengte avang hian Mizo mipuiten harsatna kan tawk tan mek a ni,” an ti.
ILP 4,064 pe tawh, a nei lo pali leh kutdawh pali man tawh
Sairang rel station-ah rel station hawn tirh, September 13, 2025 atanga October 8, 2025 thleng khan ILP 4,064 pek chhuah tawh niin, kutdawh pali leh ILP nei lo mi pali man chhuah an ni tawh.
Ningani khan Home Minister K. Sapdanga hovin Mizorama rel lo lutin nghawng hrang hrang a neihte leh Sairang rel station a ILP pekchhuah a nih dan bakah Government Railway Police din a nih chungchang pawh sawi ho a ni a. Tourist ILP neite chu Tourism Department-a an in-report dan tur pawh ruahmanna siam a ni bawk.
Thutkhawmah hian rel station-ah lehkha pawimawh nei fel lo chunga luh ruk kawng a awm em tihte thlirho a ni a; DC leh SP Aizawl tangkawpin hetiang a thlen theih leh theih loh hi a hmunah chiang zawkin lo finfiah se tih a ni.
SP, Kolasib David H. Lalthangliana chuan Kolasib district chhunga ILP pekchhuah buaipui tur hian Bairabi-ah mi pariat, Hortoki-ah mi pahnih, Kawnpui-ah mi pahnih leh Mualkhang-ah mi pahnih duty dah an nih thu a sawi.
Kolasib chhunga rel station-ah bik hian ILP 38 pek chhuah a nih tawh thu leh, Sairang thlenga rel service a awm hnu atangin Vairengte-a ILP pek chhuah leh Inter-state sumo service chu zaa 30-40 vel laiin a tlahniam niin an hriat thu a sawi bawk.
Additional SP, Aizawl Lalringliana Pachuau chuan Sairang rel station-ah rel station hawn tirh, September ni 13, 2025 atangin counter pali siam a ni a. A tirah police pariat duty dah niin, tunah hian paruk dah belh leh an ni tawh a. October ni 8, 2025 thleng khan ILP 4,064 pek chhuah tawh a ni a. Kutdawh pali leh ILP nei lova Mizoram lo lut mi pali man chhuah ni tawhin, heng mite hi thawn let leh an ni a. Sairang Zero-Point-ah a khat tawkin ILP surprise checking neih thin a nih thu a sawi.
Thutkhawmah hian Chief Secretary Khilli Ram Meena, IGP (Headquarters) H. Ramthlengliana, Home Secretary Vanlalmawia Renthlei, Transport Department Secretary Zosangliana te bakah Aizawl leh Kolasib district-a sorkar official pawimawh te an tel a ni.