Ukraine chuan Russia sipaia tang, indonaa tel nia sawi Indian an man a, ani hi indona kal meka Indian man hmasak ber a ni.
Kum 22 mi, Sahil Majothi-a hi Gujarat-a mi niin kum hnih kal ta khan computer engineering zir turin Russia a pan a. A nu chuan April thla khan ruihhlo tawlha an puhna chu a dik lo tih a lo sawi tawh.
Majothi-a hi ruihhlo tawlha puhna avanga hremna pumpelh nen Russian sipai a zawm niin Ukrainian sipaiten Thawhlehnia video an tihchhuahah tar lan a ni.
Indian foreign ministry chuan he thil hi an chhui mek a, Ukraine an biakna erawh chhan a la ni lo.
BBC Gujarati-in Majothi-a nu, Hasina Majothi-i an kawmnaah a fapa hian January, 2024 khan Russia a pan a. Thla thum chhung St Petersburg-a tawng zirna a kai hnuah Moscow-ah college a zawm a, kitchenware courier-a a inhlawh tel niin a sawi a. April, 2024 khan thil a pek kualnaa a bungruaah ruihhlo a lo tel palh niin a sawi bawk.
“Police-in an man a, dan bawhchhia an ti a ni,” a ti.
Hasina-i hian a fapa hi thla ruk tantir a ni a a hnuah kum sarih lung in tang tura hremna pek a ni tih a sawi a. Russia-a dan hre mi ruaiin engtin nge, engtikah nge sipaiah hian hnawh luh a nih a hre lo tih a sawi.
“Ukraine-a a lo lan nawlh dan ka hre lo, video darh atangin ka lo hre chauh a ni,” a ti.
Ukrainian sipaia 63rd Mechanized Brigade-in video an tihchhuahah Majothi-a hian Russian sipai zawma a leibat tlak leh lung in tang thlan tur a nei tih a sawina a lang a. Sipaia tana kum khat hnua chhuah tura tih a ni tih a sawi bawk.
Majothi-a hian mi hrang hrang atangin pawisa tam tham tak pek tuma tiam an awm tih a sawi a; mahse, a la miah lo tih a sawi bawk.
September, 2024 khan ni 15 chhung training a nei a, September 30-ah indonaah tirh a ni tih a sawi.
October 1-ah Majothi-ah an commander nen inhmuin Russian sipaite atanga kal hrangin Ukraine a lut a, puihna a dil tih a sawi bawk.
Video a darh hnu, Nilaini khan Gujarat-a Anti-Terrorism Squad (ATS) chuan Hasina-i leh a nuta, Ahmedabad-a mite chu thu an zawt fiah nghal a. A chhungte chuan an fapa a pian hian a pasal nen an inthen a, a nute lamah a khawsa zui niin an sawi.
ATS thuneitute chuan Majothi-a hi Russia-ah man a ni ngei tih an hre tawh a. Man a nih hnuah a chhungte nen an la inbe leh lo tih an sawi bawk.
Morbi-a a sikul kainaa zirtirtute chuan Majothi-a hi ‘zirlai thiam thei fak ni lo, a pangngai’ a nih thu an sawi a, chutih rual chuan a nu khawthlir tihhlawhtlin tum nia an ngaih thu an sawi.
An khawtlang hruaitute chuan sorkar chu inrawlha a haw leh theihna tur dap turin an ngen.
Majothi-a man thu a darh mek lai hian Indian-te Russian sipaiah an tang nia sawi a awm mek lai a ni a. Indian 150 chuang, zirlai leh khualzin visa nei sipaiah an tan a, mi 12 vel thi leh 16 chin hriat loh an awm nia sawi a ni.
September thla khan Indian thuneitute chuan Moscow hnenah an sipaia tang Indian 27-te hawtir turin an lo thlen tawh a. Indian sorkar hian a khua leh tuite chu Ukraine indonaa inrawlh lo turin an ti fo bawk.