Zirtawpni khan Mizo Zirlai Pawl (MZP) leh Mizoram Merchant Association (MIMA) tangkawp chuan Lammual a neih mek 1st International Star Expo-ah hnam dang rawn sumdawngte endikin an Inner Line Permit (ILP) an endik a, a nei lo leh thi tawh mi 36 an man thu leh thuneitute hnena an hlan nghal thu an sawi.
Hemi chungchanga an thuchhuahah MZP leh MIMA hruaitute chuan Mizoram chhung ngeiah hnam dangten hetiang sumdawnna an kalpui hi tha an ti lo hle a, September 30, 2025 khan joint meeting neiin dan lova hnam dang 1st International Star Expo-a sumdawngte dawr lo turin mipuite a lo ngen tawh bawk a ni.
MZP leh MIMA hruaitute chuan he expo-a hnam dang sumdawng zingah mi 20 chuang mi pakhatin a sponsor thei leh a sponsor-tu, ZORUN EVENTS neitu, Laldingngheti Pautu, Lunglei-in a sponsor-te ngaihtuah zui miah lova sumdawnna a kal pui hi hriatthiam har an ti hle a, hetiang thil hi Mizorama a thlen nawn tawh lohna turin a rang lama chhui chiang tur leh hetianga Inner line Regulation dan bawhpelha mi pakhatin heti zat hnam dang a sponsor chungchangah pawl pahnih chuan action la ngei turin thuneitute an phut tlat tih an thuchhuahah chuan an tar lang.
Chimral an nih lohna tura Mizorama hnam dang lutte khuahkhirhna dan khauh tak an neih chu mimal hlawkna um vang ringawta palzam a nih tawh lohna tur leh Mizoramah hetiang sumdawng thei lo hnam dang inthurualpuia sumdawnna kalpui awm tawh lo se, expo neih mek pawh enzuia action la nghal turin MZP leh MIMA chuan sorkar thuneitute a ngen tih an thuchhuahah chuan an tar lang bawk.