Serchhip District MJA chuan an pawl din cham kum 25-na, Silver Jubilee chu bialtu MLA, Chief Minister Lalduhoma hovin an lawm a, jubilee lungphun a hawng a. Home Minister K. Sapdanga’n khualzahawm niin a hmanpui bawk.
Kawnpui VC Hall-a jubilee lawmna inkhawmah hian chief minister chuan India danpui Fundamental Rights-ah ‘Right to freedom of speech and expression’ chuang chu Supreme Court-in Right to freedom of Press a huam tiin a hrilhfiah tih a sawi a. “Chanchinbu chu democracy venghimtu pawimawh a nih avangin Fourth Pillar of Democracy an ti thin,” a ti.
Chanchinbu chu sorkarin a hmalaknate mipui a hrilhna hmanruaa a hmang ang bawkin mi mal, pawl leh kohhran, political party pawhin an thu leh hla puan chhuah nan an hmang tih sawiin, “Mipui aw a nih rualin mipui beng leh mit a ni nghal,” a ti.
Ram inrelbawlnaa hmanraw pawimawh a nih avang chuan journalist-te chu khawtlangah dinhmun sang tak an luah tih a sawi a, sorkar pawhin a dah sang tih chief minister chuan a sawi.
Accredited journalist-te chu dawt leh thu belhchian dawl lo thehdarh turah an ngai ngai tih sawiin, “Social media-ah thu belhchian dawl lo a tam avangin mipuiten thu dik hrilhtu leh kaihruaitu tha an mamawh a. Nangni, kan MJA member leh accredited journalist-te hi thu dik puang darhtu, mipuite tana rinawm taka rawngbawltu ni tura ngaih in ni,” a ti.
New Media hmanruate chu lo hmang thiam ve zel se tha a tih thu leh nitin chanchinbute nena inhnerem taka kalpui theih a that thu a sawi bawk.
Khualzahawm, home minister chuan silver jubilee souvenir a tlangzarh a. Journalism tha lehzual kalpui tura journalist-ten hma an lak a pawimawh thu sawiin, “Kan hmaa golden jubilee lo la thleng tur thlir phaka ke kan pen a tul a ni,” a ti.
Silver jubilee lawmna inkhawm hi an vice president, Kapliana Pachuauin a kaihruaia, President C. Lalhminghlua leh MJA General Headquarters aiawhte pawhin thu an sawi a. An member boral tawhte sunna an hmang bawk.
- Serchhip District MJA:
Mumal taka kal Serchhipa chanchinbu hmasa ber chu Lenkawl niin kum 1981 khan Remmawia Kawlniin a din a. Kum 1993-ah Ramlai Arsi a chhuak ve leh a, kum 2000 chhovah an pung ta a. Serchhip District Journalist Association an din a, kum 2006-a Mizoram pum huapa MJA an lo inchhunfin khan an inchhunglut ta a ni.
Tunah hian Serchhip district MJA member hi 14 an ni.