Aizawl: Mizoram Pradesh Congress Committee (MPCC) chuan Thawhlehni chhun khan Aizawl Press Club-ah thu thar thehdarhtute an kawm a, Indian Air Force (IAF) kuta Lengpui Airport hlan an duh ngai dawn loh thu an sawi.
MPCC Chief Spokesperson John Siamkunga chuan Lengpui Airport chu Airport Authority of India (AAI) enkawltir nise an duh ber tih sawiin, “Mizoram airport a nih anga zalen tak leh thlamuang taka mipuiten an hman theiha a awm hi kan duh ber a ni. IAF kuta hlan hi kan phal ngai dawn lo a ni. Anni kuta hlan a nih chuan an strick dawn a, phal loh thil tam tak karah kan leng ang a, kan chep hle dawn a, chu chu kan duh lo,” a ti.
John Siamkunga chuan June 11, 2024 khan Chief Minister’s Office (CMO)-ah IAF hotute leh Lengpui Airport chungchang ngaihtuahtu tur, sorkarin Working Committee a dinten meeting an nei ho tih sawiin, “IAF chuan Lengpui Airport enkawl chu an duh thu an sawi a, Mizoram aiawhte pawhin an remtihpui a ni,” tiin, IAF enkawl airport tam takin an enkawlna hnuaia awm an duh tawh loh avanga airport dang, a thar an din chhoh zel laia IAF kuta Lengpui Airport hlan chu Mizoram mipuite tan chuan lungchhiat thlak an tih thu a sawi.
MPCC chief spokesperson chuan IAF kuta an hlan a nih chuan Mizoram hian nasa takin a tuar dawn tih sawiin, “Thlawhna tumhmun leh a control-na operational area chauh IAF-in an enkawl ang a, a bak zawng terminal building te, car parking-te, security personnel hote leh a dangho zawng hi Mizoram sorkarin a enkawl zui dawn a, sorkar tan sum sen zuina tur a tam hle dawn a ni. An inhlanchhawn tum dan hi Mizoram tan chuan channa nasa tak a ni dawn a, kan tuar hle dawn a ni,” a ti.
Chief Minister Lalduhoma’n ‘IAF kuta hlan turin Draft Memorundum of Understanding kan nei tawh; a pumin kan pe dawn lo. A runway atanga lehlam zawng, terminal building lo lam, ramhnuai zawng khu an nei ang a. Chu chu a man kan chhutchhuak ang a, an lei ang, a leiin. Chu ringawt pawh chu kan thlahlel ve a nia, a man chu’ tia a sawi thu sawiin John Siamkunga chuan, “Kan inphel dawn tihna a ni a, a va rapthlak em! Airport khu ZPM sorkar hian a tichhe vek dawn. IAF-in zin mite tan tih tak takin an enkawl dawn lo tihna a nih chu. Bumin an awm mek a ni. Sum ringawt it a thil tih hi chu a pawi a, a daih rei dawn si lo,” tiin a tuartu tur chu mipuite bawk an nih dawn thu a sawi.
MPCC chief spokesperson chuan RTI chhanna atanga an hmuh danin AAI kuta Lengpui Airport hlan tura hmalakna mumal a la awm lo. AAI enkawlna aia IAF hnuaia awm ZPM sorkarin a duh zawk tlat hi thil mak sawi hleihtheih loh a ni. Airport sir, km 1.5-a hlaah hian IAF chuan ram zau tak, zangnadawmna hmangin an la fel der tawh nia langte chu pawi a tih thu a sawi bawk.