Aizawl: Mizoram Legislative Assembly member-te tana buatsaih, ni hnih chhung awh Artificial Intelligence (AI) chungchang zirna hun chu nimin khan Assembly Speaker Lalbiakzama’n a hawng.
Assembly Conference Hall-a ‘Empowering Mizoram Legislative Assembly with AI: Training on Artificial Intelligence for the Members of Mizoram Legislative Assembly’ hawnna inkhawngah Speaker Lalbiakzama chuan khawvel hmasawn zelah theihna leh thiamna sang zelin, technology hman nasat a ngai deuh deuh dawn a, ram hruaitute tana heng thiamna thar, AI hman dan hriat chu a pawimawh avanga hun buatsaih a nih thu a sawi.
Speaker chuan Mizo tawng ngeia AI lama mi thiamten zirtirna an pe thei tur chu lawmawm a tih thu leh a bulthut atanga thiam a pawimawhzia sawiin, MLA-te chu he training an hlawkpui ngei theih nan duhsakna a hlan.
Inkhawm hi Mizoram Legislative Assembly Additional Secretary Lalthangmawia’n a kaihruai a. Vawiin lamah zirna neih chhunzawm leh a ni dawn a, thupui hrang hrang hmangin MLA-te chu LushAITech atangin resource person – Lawmna Kima, CEO; Lalremruat Kima, CFO; leh Robert Lalramhluna, VP-ten an zirtir dawn a ni.