Eunice Rosangpuii, Maria Lalhriatzuali leh Lawmsangzuali te’n Mizo Idol Top 10 intihsiakna paltlang zo lo vin, intihsiakna dawhsan an kalsan a ngai ta.
October 23, 2025 zan khan Mizo Idol season 8 Top 10 intihsiakna chu R Dengthuama Hall-ah Live audience hmaah neih a ni a. Top 10 atang hian mi pathum thawt tihtlak an ni a. Inrinni zan khan result puan a ni.
Kolasib Venglai nula Eunice Rosangpuii chuan Top 10 intihsiaknaah Elizabeth Zodinpuii hla hit — Valmawi — tih chu muang no nalh takin siam danglam mah se, judge-te beng a fah zo meuh lo va, a tawrh phah ta a. Ngun taka a zai ngaihthlak pawhin a tang ulh deuh hret niin a hriat nghe nghe.
Chhinga Veng nula Maria Lalhriatzuali pawh, he round-a fakna hla satu pahnih zinga mi niin, Opa (Tribal Power) hla — Mamawh Chhanna — a sa a. Judge Hmingtea’n zai tha tiin, Jaui’n zan dang ai chuan a zai chu ziaawm tihsakin, K Hminga’n a hniam lam tlemin a zo lo hret tia a comment-te ngaihtuahin, a che tha tawk lo tih a tichiang a. Judge-te duhkhawp a hlawh tawk lohna chuan round sang zawkah a vawrh kai pha ta lo ni berin a lang.
Johana hla hit — Chhingmitthla — hmanga Mizo Idol Top 10 intihsiakna bul tantu, Shillong nula Lawmsangzuali zai chuan judge zinga mi, Hmingtea’n a ‘tap aw’ lo lang thin chu mawi a tih thu sawiin a fak a. K Hminga pawhin a thu leh thu inhlanchhawn laia a aw thler mawi a tihzia sawi mah se, duhkhawp lohna lai neia a duh anga a la sak chhuah loh thu sawiin a zai a comment bawk a. Hengte avang hian duhthusam ram thleng phak ta lo vin, Mizo Idol intihsiakna chu a mangtha a tul ta zawk a ni.
Heti hian, Laldinsanga, Zomuansanga, Remlalvuani, Vanlalneihpuii, Emmanuel Lalremruata, Sylvia Malsawmpuii leh Lalthakima te’n Zonet buatsaih LEDSDE Mizo Idol intihsiakna dawhsan an hmachhawn chhunzawm a, inrinni zan khan intihsiakna nei chhunzawmin, thawhlehni zan hian result puan a ni ang. A tlingte an intihsiak chhunzawm leh nghal dawn bawk a ni.