Thailand leh Cambodia hruaitute chuan Pathianni khan an ramria an intihbuaina chin felnaa palai hna thawktu leh Nobel Peace Prize dawng tura chhawp chhuah nih tum mek, US President Donald Trump-a awm laiin inremna an ziak.
Thla thum kal ta khan Trump-a hian khatih laia an ram hruaitute biaa an indona an titawp lo a nih chuan Washington nena sumdawnnaa an inthlun zawmna tihtawpsaka a vau hnuah inremna an lo siam tawh a, hei hi tun tumah hian an daih rei zawk turin an ziak thar leh ta a ni.
Ram pahnihte hian ni nga chhung rocket leh laipui hmanga an indonaah khan buaina chawk chhuaktuah an inpuh ve ve a, mi 48 vel thiin mi 3,00,000 vel an tlanchhia a, an ram hnih chanchina an intihbuai nasat ber a tling.
Trump-a hi a president vawi hnihnaah hian khawvel muanna siamtu angah a inchhal a, Malaysian premier Anwar Ibrahim-a’n Cambodian Prime Minister Hun Manet-a dawr hnuah inrawlhin buaina hi hmeh mih a ni.
Asia chhimchhak ramte, ASEAN-in Kuala Lumpur-a intawh khawm an hmanna hmunah inremna hi ziah niin Trump-a chuan ram hnih hruaitute chu an huaisenna a fak a, inremna chuan ‘nunna maktaduai tam tak’ a hum dawn tih a sawi.
“America-in heng lai hmun leh hmun dangah pawh muanna siam a tum a, ka sorkar hian buaina awm thei vengin tihtawp a tum nghal zel dawn a ni,” tiin remna ziahna hmunah hian a sawi.
Ram pahnihte hian thuchhuah intawm an siamah an ramri ve ve atanga sipai leh an hmanraw chhawpte hnuhkir an tum a, Thailand hian Cambodian an man 18 an chhuah bawk ang.
Rahpuah bomb an kamte lak chhuah leh vek an tum bawk a, hei hi an buaina bul ber a ni a. Thai sipaiin rap puaka a thih hnuah an intibuai a. Thailand chuan Cambodia kamah a puh a, lehlamin an pha thung.