Hri leng chenpui thiam chunga hmachhawp hlen a hun
MBSE chuan thawhtanni atanga HSLC examination an tan hnuah, a tuk thawhlehni atangin HSSLC examination an neih chhunzawm lehnghal bawk a, hri leng vangin zirlai thenkhatin exam bul tan thei nghal lo mah se, a tam zawk erawh chuan an exam thei thung a ni.
Board exam nei tura MBSE lam inbuatsaihna hi a tha hle mai a, an inbuatsaihna hrang hrangte hun hmasa lamah lo sawi tawhin, an chairman in plan A,B,C te an neih thu a lo sawi tawh a, fakawm tak an ni. Thawktute inpekna leh hmalakna fak loh theih a ni lo.
Hri leng karah kan awm a, eng chen nge min chenchilh dawn a hriat miau loh avang hian hri leng chenpui dan kan thiam hi a tha a, chumi tura kan lo insiamrem ve zel pawh hi tul tawh tak a ni.
Anni aia pawl sang zawk, college zirlaite dinhmun pawh hi siamrem a, final exam bei turte ngat phei chu offline-a an exam ve ngei theihna tura hmalak leh hmalakna tur hrang hrang pawh duan hun tawh tak a ni bawk.
Tun hnai lawkah pawh Aizawl khawpui chhunga college hrang hrang hruaitute chuan MZP punin, offline-a class an kal ve duh tawh thu leh exam pawh offline ngeia tih an duh thu an sawi a, sorkar beng hi thleng se la, anni aia pawl hniam zawkte pawhin offline-a zirna an kalpui thei a nih chuan, zirna sang zawk leh final exam hmachhawn ve tur tho, puitling zawka ngaihte pawh an dinhmun tihchiansak vat thei se a tha hle. Ruahmanna felfai leh tha a awm phawt chuan hri leng kara hmachhawp hlen hi a har lo tih i hre tawh mawlh teh ang u.