- Robert Zoliana
Zahna chhete mah a nei tawh lo che
Inlaichinna hlawhtling leh hmangaihna dik takah hian inzahna (respect) hi a banpui a ni tih hria ang che. Inzahna awm miah lova inngaihzawnna leh inlaichinna hian mi pahnih inkara rual khai lo leh inhlut tawnna buk tawk lo nasa tak a awm tih lantirna tha ber a tling. I ngaihtuahna, feeling, i thil tum leh mamawh te a ngaihsak hlawl lova, inzahsakna lam hawi a lantir ngai loh bawk chuan harhchhuak nghal ang che. A zah loh che chuan i thutlukna leh remruatna a hnawl ang a, a hmuhsit dawn che bakah in inkar tha tura i hmalakna te pawh a palzut zel ang.
Midang a ngaina thar thut
An fel vang te, an thatna te leh duhawmna te vanga ngainat te hi thil awm thei leh thleng fo thin a nih laiin, fiam zuk zuk a ching a, a thutak \an viau nia A lan tawh chuan buaina a inmung chho ta tih hria ang che. Midang ngaihtuah reng leh an chanchin sawi reng mai hi a dawngsawngtu tan a luhaithlak a, ngaihven leh ngaihsak hlawh tawh lo nia inhriatna a pai tel vangin thlamuanpui vak a chi tawh lovang.
A hmalam hunah i lang tawh lo
A mit-ah tak khan en la, a thil tum, beisei leh hma-ngaihna te bakah a future-a a ruahman te pawh hmuh theih a ni fo. Inngaizawng emaw nupa in nih pawhin pumkhat in nih anga thil tum in-ang (common goal) a awm ngei ngei tur a ni. Hei hi i kawppui thusawi, chezia leh nunziaah i hmuh loh chuan ngaihtuahna thar i neih a ngai ang. Tu emaw zawk zawk thil tum leh beisei a hlawhtlinna turah theihtawp inchhuahpui hi inngaihzawnna a ni emaw nupa nunah pawh a pawi-mawhin, a langsar tur a ni.
A sawisel reng mai che
Mihring tute pawh hian insawiselna hi kan ngai thei lova, kan duh lo vek. Ngaihzawng leh nupa inkarah te pawh ni se, eng emaw hleka insawisel nghal vak te, a thawk a phita sawiselna tur zawn reng mai te hi a khamawm a, thil kalhmang tha pangngaiah a awm ngai lo. A sawisel réng tawh che chuan a ‘interest’ lo tial tial che tih hre mai rawh. I ngaihdan leh thusawi chhuah te ngaihtuahsak che emaw zahawm taka dawngsawn lova, thil i tihsual palhin emaw a lung-awi loh a pianga i nungchang leh mizia a hmer tel ziah chuan tho la, inthing harh ang che.
I hlimna leh lawmna te, i thil tum leh beisei ah te khan i ngaihtuahna huai takin sêng ngam tawh la, i hlutna leh i phu ngawih ngawih thilah te chuan huaisen takin ding ngam bawk ang che.