Lionel Messi chu November thlaah Kochi, Kerala tlawh tura ruahman a nih hnuah Argentina Football Association (AFA) chuan tlawh an tum loh thu an sawi a. Heti a nih chuan khawvela footballer tha bera mi tam takin an chhal hmel hmuh tumte chuan an hmu thei dawn ta lo.
Kerala Sports Minister V. Abdurahiman chuan vawi eng emaw zat chu World Cup champion Argentina an mikhual tur thu hi a lo puang tawh a. Inrinni khan Emaraj Group International Managing Director Anto Augustine chuan FIFA atanga remtihna an hmuh theih loh thu sawiin Kerala-a Argentina leh Australia inkhel tura ruahmanna an lo siam tawh chu puitlin theih a nih dawn loh thu hi a puang a ni.
AFA pawhin thuchhuah an siam a, Kerala hian ram pahnih inkhel dawngsawng tura an mamawh an sawite chu an tihhlawhtlin theih loh avangin inhnuhdawh mai an titlu ta tih an sawi.
November-a India tlawh tuma an inbuatsaih nasat thu sawiin, India ramah hian a hmunhma vel en fel turin aiawh pawh an tir tawh tih an sawi a. Chutianga an en fiah hnuah an duh anga thil an lo buatsaih loh avangin an thulh leh ta niin an sawi a ni.
Lionel Scaloni kaihhruai Argentina team hian November thlaah Spain an tlawh ang a, chu mi hnuah Luanda panin Angola nen friendly match an khel dawn a. South America an pan leh ang a, November 18 thleng training an nei zui dawn niin AFA chuan an sawi.
Australia pawhin India pan chungchang an sawi ri lo a, Socceroos chu November thlaah USA-ah an kal ang a, Venezuela leh Colombia nen an inkhel dawn a ni.
Messi hian Kerala tlawh dawn lo mah se ruahmanna dangah December-ah hian India chu a tlawh dawn tho a. ‘GOAT Tour’ an nei dawn a, Kolkata, Ahmedabad, Mumbai leh New Delhi te a tlawh kual dawn a ni.