Aizawl: Agriculture Minister PC Vanlalruata’n Mizoram sorkarin Zofate hmasawnna tur ngaihtuahin theihtawp a chhuak tih a sawi.
Inrinni khan Zomi Cultural Society Gen Hqrs. Mizoram leh Zomi Cultural Society Aizawl Joint Committee tangkawpin Bawngkawn South YMA Hall-a ‘Khuado Pawi 2025’ an buatsaih hmanpuitu agriculture minister chuan a hmangtu zawng zawngte duhsakna chibai a buk a. Mizoram hi Zofate Jerusalem a nih avangin chhim, chhak, hmar leh thlang atangin an kalkhawm a, an chengho bawk a, Mizoram tan thil tha ti a, malsawmna ni turin tangho turin kalkhawmte a sawm.
Mizoram sorkarin Zofate hmasawnna tur ngaihtuahin theihtawp a chhuah a, an zavaia an thlawp a pawimawh tih sawiin PC Vanlalruata chuan, “Zofate Jerusalemah kan chengho a, tawng chi hrang hrang kan hmang a, heng kan tawng hrang hrangte, culture, kût te hi tha takin humhalh zel ila, kan tawng hrang hrangte hi inhriat sakin inhhumhalh sak tawn zel ang u,” a ti.
Inkhawmah hian ZCS Gen. Hqrs President T Thang pawhin thu a sawi a. Kût lawmnaah hian an member zinga hlawhtlinna chang thar mi 14 hnenah chawimawina thuziak an hlan a, pensioner pakhat leh professor ni thar mi pakhat an chawimawi bawk.