- K. Hmingthankaia
Hman tukzing ka bazar kal tur chu mi pakhat, tunhma deuh pawha Aizawl tlaklam veng pakhat VCP pawh lo ni tawh chuan mi lo tidinga, tih tak deuh leh ruk deuh tak hian, ” Chanchinbua i thu ziahte ka lo chhiar thina, thil pakhat hrilh duh che ka nei. Assam Riffle chhuahsan ram hman dan tur chungchanga ram awl hmun hring, green area tur zuah kha a zau lutuk. Mahse, ZPM rilru atang chuan a tha lutuk anga, mahse, ngaihtuah teh, tunhmain Pu Thena PC sawrkarin Aizawl tihthawlna tur, New Capital Complex Luangmual a lo buatsaih pawh a hnua Congress leh MNF sawrkarin an tihkhawloh vek tawh hi. Nakinah ZPM sawrkar loh huna buaina mai a la ni ang tih a hlauhawm. Chuvangin, mipui mamawh thil atan tunah tikhat vek zawk rawh se” tiin, kei, engmah nihna leh tih theih nei hauh lo chu mi lo hrilh ve tlata.
A hnu deuhah Chanchinbuah Dr. C. Lalrampana’n helai ram master plan chungchang a rawn sawi zauna tawp lamah khitiang hlauhthawnna khi a rawn sawi tel zauh bawk nen, AR ram hlui chungchang hi tlem ka’n sawi ve mai mai ange.
AR ram hlui kan hman dan turah hian duhthusam leh rawtna hrang hrang tha tak tak vek, mi chi hrang hrangin an sawi hnem tawh. A vaiin a tha em em veka, tha ber leh thlan ber tur a vang duh khawp ang. Thutlukna siam thei turtu tan pawh a harsa hle anga, mawhphurhna a sang si, tumahin nakin hi a dik takin kan hmu lawk thei bawk si lo. Nakin kum tam tak lo kal turah hian mipui dem an hlawh reng mai ang tih an hlau ve hle ngei anga, a tha ber tur dawnin, chawl lovin an ngaihtuahna pawh an hman reng a rinawm.
Tuten emaw an hlawkpui bik ang tih kan initsik tawn theuh vang leh kan hlauhthawn vek vang pawh ni chuang lovin, tute pawh hian helai hmun remchang tha lutuk mai, tlai khawhnua kan lo nei ta hi, nakin zel atan pawha kan vaia tan a tha thei ang ber tura hman tangkai theih turin awm se kan tih theuh vang a ni zawk. Mahse, tumah hian nakin hla tak chu sawi loh, tun atan mai pawha thil tha ber tluantling hi chiang tak leh dik takin kan hre lawk vek thei si lo. Tin, thil tha zawng zawng leh kan duhthusam theuhte hi he AR chhuahsan ram ruakah hian kan dah leng vek hek lo. Chuvangin, helai ram hman dan tur thutlukna siam theite hian rilru fim tak pu chunga an thutlukna siam chu kal tlangpui mai rawh se. Rawtna leh thu hrang hrang sawi hian tawpintai a nei dawn chuang lo.
Chuvangin, helai ram hman dan tur ngaihtuahtu Committee sangin, ni 16 October 2025-a helai ram master plan an tihchhuah kha a chipchiarin hre ve lo mahh ila, ka hriat chinah khan kei chuan tha tawk ka lo ti thawkhat ve ngawta. Mipui mamawh, kawng siam, tui dahna siam, electric transformer bun, police out post leh thil dang thenkhat, in sak lam atan a ram pumpui atanga 39.33? leh hmun awl hring nuam tur 60.67? an ruahman kha tawk ka lo ti ve hle a ni. Mahse, kha kha thu tawpna, final a ni chiah em tih chu ka hre lo naa, hna erawh thawh tan a la nih hma hian enge maw han sawi ve hrim hrim duh ka nei a ni. Mahse, thu tlukna erawh Committee thu thu nise.
Pu Rampana sawi ang deuh khan, Convention center kha mipui leng zat tur hisap mi 2000 kha a tlem mah mah ka ti deuh a ni. Tin, open air Theatre kha khawilaiah nge, engtin nge an sak dawn tih chu keini ang tan chuan lo mitthla thiam a har hle naa, mahse, a lian thei ang ber siam nise. VVIP lo kal chang emaw, international event emaw a awm pawha mihring tam tak dawl zo tur ngei ni bawk se. Tin, Babu tlanga mipui tana hmun hring, green park siam tih kha tha ka ti lutuk. Khawpui boruak ri luih luih kara hmun hahdam lo awm tur kha a va tha em.
Police Out Post dah tih kha ngei ngei turah ka ngaia. Mahse, AR Hospital hmun hluia dah kha chu chhimlam a hlat mah mah ka ti a, tin, a piah lawkah Main Police Station a awm tho si a. Treasury lam hnaih deuhah hian awm thei se ka ti deuh a ni. Helamah hian boruak chi hrang hrang a tam thei si a. Chumi a nih loh pawhin, Polce OP hi hmun hnihah tal dah nise.
Chubakah, vantlang kawngpui atanga hmuh phak loh, AR ram chhuahlam, Venghlui leh Bethlehem dep lam ram ruak leh reh deuh lam vel hi hman atanga vawiin thlenga mi awm tha duh lo leh rukrute zalenna hmun a ni a. Zan chu sawiloh, chhun engah pawh mahnia kal chu a nuam chiah lo a ni. AR an chhuah hnu phei kha chuan, henglai vela building-a ruk theih zawng zawng ru thin leh riak thinte hi hmuh an hreawm hle a, henglai veng hnaivai tan an hlauhawmin inven ruk reng a ngai bawk a ni. Chuvangin, helam ram ruakah hian a hranpaa vengtu lam dah theih a nih loh pawhin, hmun hnih khatah building pawimawh, chhun zana mihring chettlat rengna tur lam chi awm thei ngei se tihte hi ka han rawt ve duh a ni e.
Thil pakhat erawh ngaihpawimawh deuh ka nei, Pu Rampana sawi ang khan, Loch house hmuna CM bangla leh office dah tum kha kawng tinrengah a tha lo hulhual ka ti. He Historical building Loch house hi engtin mah khawih dang lam lova, tuna a awm ang hian a theih chen chen vawn him reng tur zawk a ni. Chubakah, Chief Minister meuh office leh chenna atan chuan a ualau lutuk, a zahawm lo zawk bawk. CM meuh chettlatna chu fianrial zahawm, zau deuh zawk raih ni rawh se. Chubakah, CM behbawm leh amah pan tur mipui pangngai bakah, thil nawr leh nuar hoin a gate vel an awh leh vak vak thin anga, helai kawng leh hmunhma vel zau bawk si lo hian mipui harsatna a thlen fo dawn a ni. Nakinah, sawn kan la duh leh tho ang.
Aw le, duh tawk ang, duhthu sam dawn chuan sam tur a tam lutuk, kan sam seng dawn chuang lo.
Chuvangin, Assam Riffle chhuahsan ram hman dan tur Committee sang kokim taka ruatte khan, mi zawng zawng duhthusam leh lungawina, tha famkim chatuan tur kha engtikah mah in committee chhuah thei dawn chuang lova, huaisen takin thutlukna siam thuai thuai ula, helai ram hi a khawloh tam hma hian sawrkarin hma la vat zawk rawh se, tih hi ka rawn tawng ve chhan mah chu a ni e.