Bruno Fernandes chuan Manchester United chhuahsan a la tum loh thu sawiin, kum thara FIFA World Cup khelh zawh hnuah chauh a hma lam hun chungchang sawi a tum.
Portuguese midfielder hian January, 2020 khan Sporting CP atangin Manchester United chu £ maktaduai 47-in a zawm a. Premier League a pan hnuah hian inkhel vawi 17-ah chauh a inlan lo a, heng zinga vawi thum hi damloh vang leh inhliam vang a ni nghe nghe.
Inrinni zana Brighton & Hove Albion a hmachhawn khan Red Devils tan vawi 300 a inlan chiah a. Old Trafford-a a insuan luh hnuah he inkhel tel lo hian goal 184-ah a inhnamhnawih tawh a, goal 100 thunin mi goal thun tur vawi 84 a siamsak tawh a ni.
Saudi Arabia club Al-Hilal chuan pawisa tam tham deuhin an thlem mah se Fernandes hian a hnawl a, Manchester United chhuahsan a la tum loh thu a lo hrilh.
Kum 2027 hian a contract neih lai a hmang zo tawh dawn a, kum khat dang pawh sei theih turin thu an dah sa a. Heti chung hian a awm zel dan tur chu engmah a la sawi chiang duh rih lo a ni.
Fernandes chuan, “A hma pawha ka lo sawi fo tawh angin heti lai hmunah hian ka hlim a, ka duhthusam thlentir zel ka la duh a. Club hian engtin nge hma an lak dawn ka hre lo a, mi tam tak chuan season tharah chuan chhuak tawh tur angin min sawi a. Hei hi club-in an remti a nih pawhin keima thutlukna a ni lo vang. Hetiang chungchangah hian tu mah ka la be lo,” a ti.
“Ka agent hian engtin nge hna ka thawh thin tih chu a hre chiang a. Hma lam hun chungchang kan sawi dawn a nih pawhin World Cup hnuah a ni ang a. Chu mi hma chuan tu mah biak ka tum lo. Keimah tak hi chuan chhuah ka la tum lo,” a ti bawk.
Manchester khawpuia kum ruk dawn a awm hnuah Fernandes hian EFL Cup leh FA Cup a la tawh a, hengte hi Erik ten Hag kaihhruaina hnuaiah ve ve a ni a. Vawi hnih (2021, 2025) chu Europa League final a lut tawh a, an chak lo ve ve thung.
Tuna Old Trafford club captain ni mek hian nomawi lak belh a la tum hle a, mi mal chawimawina aiin team hlawhtlinna chu a dah hmasak thu a sawi.
“Mi hian ka chanchin tha lampang hi sawi tur nei tam se tih chu duhthusam a ni a. Chutihrualin team hlawhtlinna hi ka duh ber niin, hetiang hi Manchester United-ah hian hriat tur a awm lo hle a. He club-in hlawhtlinna a mamawh hi ka neihpui thei lo hle a, he club ka zawm tirha ka suangtuah ang ram kha ka la thlenpui thei meuh lo a ni. Nomawi lak ka duh a, a tha zawnga hriat hlawh reng theih ka duh ber a ni,” a ti.