Union Minister Dr Jitendra Singh chuan Dampa bial by-election lo awm tur atan Silsuty-ah vantlang inkhawm a buatsaih a. He inkhawmah BJP Mizoram President Dr K Beichhua leh BJP candidate Lalhmingthangate pawhin thu an sawi.
Ningania Silsury Playground-a vantlang inkhawm buatsaihah Union Minister of State in the Prime Ministers’ Office Dr Jitendra Singh chuan Prime Minister Narendra Modi-a sorkarin hmarchhak a ngaihtuahin, a ngai pawimawh tih a sawi a. Tunah hian Dampa bial by-election atan chauh ni lovin, kum 2028 MLA inthlanpui atan pawh Mizoram a rawn tlawh tel nghal tih a sawi.
Union MoS chuan BJP sorkarna state-ah hmasawnna nasa takin a kal mek a, tunah hian Dampa bial by-election-ah BJP official candidate Lalhmingthanga hi Dampa mipuiin an thlang tling a nih chuan Ambulance pek tiam an nih angin, pek an nih tur thu a sawi a. Ambulance ringawt ni lo vin, state danga hmasawnna nasa tak a thleng mup mup angin Dampa bial-ah nasa takin hmasawnna a thleng dawn tih a sawi.
BJP Mizoram President Dr K Beichhua pawhin tunah hian D2D an tih tak hi Dampa biala Silsuri hmunah a thleng dik mek a, Union Minister hi Delhi a ni a, Hmingthanga hi Dampa chu a ni. Delhi leh Dampa chu an thlunzawm tawh a, Dampa bial hmasawnna tur leh Dampa bial mamawhte a taka hmalak a nih theih nan BJP candidate chu vote hmanga hnathawk thei tura an siam a ngaih thu a sawi.
BJP candidate Lalhmingthanga pawhin thusawiin, Dampa bialah kum 50 bawr inthlan a lo hmachhawn tawhah, MLA, minister te pawh nei nual tawh mah se hmasawnna hnathawh hmuh tur erawh a tlem hle tih a sawi a. An thlang tling anih chuan, Dampa bial mamawh hrang hrang hretu leh hmutu, bial chhung mi ngei a nih avangin an harsatna sutkian anih theih nan central hruaitu ten hmalakpui an tiam ang ngeiin a takin hmasawnna an hmu ngei dawn tih a sawi bawk.