Bollywood khawvela pa chan chang mek Dharmendra chu Mumbai-a Breach Candy Hospital-ah dah luh niin, a dinhmun erawh ngaihtuahawm a ni lo.
Dharmendra fate pahnih Sunny Deol leh Bobby Deol te chuan an pa dinhmun chu ngaihtuahawm a nih loh thu sawiin, medical test hrang hrang an tih result te pawh a tha a, ngaihtuahawm a nih loh thu an sawi.
Dharmendra damdawi in awm thu hi online-a a darh hluai hnuah fans te chuan a chanchin ngaihvenin damdawi in lam leh amah hnaihtute an be pawp nasa hlea sawi a ni a, kum 89 mi dinhmun hi ngaihtuahawm a nih loh thu a fapate pahnih hian an sawi ta vat a ni.
A kum a tam ve deuh tawh avangin Dharmendra hi mipui hmuh theihin a inlan khat ta viau a, April thla khan a mit zai a nih bawk avangin December a kum 90 tling mai tur Dharmendra hi a chak lo chho ve ta hrim hrim a, a nupui lemchanthiam leh politician ni bawk Hema Malini nen an inawm deuh chawt rih a ni ber.
Film lamah a inlan hnuhnung ber chu kum 2024 a tihchhuah ‘Teri Baaton Mein Aisa Uljha Jiya’ tih kha niin, hetah hian Shahid Kapoor leh Kriti Sanon te nen an chang dun a, tunah hian tihchhuah tura hmachhawp pakhat a nei leh mek bawk a, an ruahman dan chuan December thla hian tlangzarh an tum a ni.