Aizawl: BJP Mizoram President Dr K Beichhua chuan Special Assistance to States for Capital Investment (SASCI) sum atanga Saiha tana sum hmuh Rs vbc 75 chu state sorkarin chhuhsakah a puh.
Thawhtannia BJP Mizoram in an party pisa-a karthar inhlanna leh political session hun an neihah thu sawiin BJP Mizoram President chuan, ZPM sorkarin an sorkar hunah restricted tender an ti ve dawn lo tia an intiamna chu dawt a nihna a lang chiang leh ta tih sawiin, “Sawi loh anga awm thin sorkar kan hrawn leh mek a ni,” a ti.
Saiha bialtu MLA Dr K Beichhua chuan SASCI sum atanga Siaha district tana hmasawnna hna thawhna tur, state sorkar sum hmun Rs vbc 328 atang Siaha district tana sum pek tur, Union Finance Minister ngeiin a pawmsak tawh, Rs vbc 75 chu state sorkar hnena ziak ngeia an thlensak pawh ngai pawimawh duh lo va, ZPM sorkarin a chhuhsak vek chu mak a tih thu sawiin, Union Minister thu meuh zawm duh lova an awm chhan ZPM sorkar a zawt tih a sawi.
Tunah hian central lamin state sorkar hmalak dan an hriat mai bakah, anni pawhin state sorkar hmalak duh dan hi central-a an houte hnenah an thlen nghal dawn avangin, hetiang rilru state sorkarin a put takah chuan anni Mizoram tana thil tha duh leh hmangaihtu tan chuan kalphung thar kal dan an hrethiam tawh lo tih sawiin Dr K Beichhua chuan, “Engkim mai hi kan politicise dawn a nih chuan kan hmabak hi a eng vak bik hian ka ring lo a ni,” a ti bawk.