Aizawl: Mizo National Youth Front (MNYF) President Robert Romawia Royte, MLA chuan ZPM sorkar hnuaiah dan bawhchhiatna a nasa tih a sawi.
Thawhtannia MNF Hnam Run-a chhung inkhawmah Robert Romawia Royte chuan ZPM sorkar hnuaiah dan bawhchhiatna a nasa tih sawiin, “Kuhva tawlhruk a hluar a, fertilizer tawlhruk chungchangah pawh chief minister a inrawlh nia sawi a ni. Dampa bial by-election campaign neih mekah pawh ZPM sorkar hian dan an bawhchhe nasa hle. Dan bawhchhiat hi engahmah an ngai lo ni hialin a lang a, a pawi hle a ni,” a ti.
Hachhek bialtu MLA Robert Romawia Royte chuan, “Dampa mipui zingah ZPM hlawkpui an awm lo. ZPM hian buhfai man a letin an ti to a, electric bill a an ti sang nasa hle bawk a, Dampa bial kawng a chhe em em bawk a ni,” a ti a. “Dampa bial mipuite hian ZPM sorkar hian engmah tak tak an ti thei lo tih hria se ka duh a. Dampa bial mipuite hian Dr R Lalthangliana, mithiam leh Central lamah pawh a ngaihna hre tur, he bial harsatna tak tak lak atanga phurchhuak thei tur an thlan tlin hi a tul hle a ni,” a ti bawk.
Hmunphiah leh sawhthing lei leh hralh chungchangah pawh ZPM sorkar a hlawhchhamah puhin Robert Romawia Royte chuan, “Sawhthing leinaah vaibelchhe 4 chuang sum a chingpen thute kan hria a, chhui chiangin thil dik lo titu hrem thuai se kan duh hle a. Hmunphiah chungchangah pawh kuthnathawktute an tibeidawng hneh hle a, Mamit district hmunphiah farmer-ten sorkar rate-in hmunphiah man an tel lo nasa,” tiin, pawi a tih thu a sawi.