Aizawl: India rama sorkar damdawi in tha bik tehnaah Primary Health Centre pakhat – Marpara PHC, Mamit District leh Zemabawk UPHC, Aizawl East District te an tling thar a, heti hian Mizoram chhunga HWC-PHC 57 target awm zinga 40 leh HWC-UPHC pakua target awm zinga parukin National NQAS certificate an nei tawh.
National Health Mission, Mission Director Dr. Lily Chhakchhuak hnen atanga thu kan dawn danin, India rama sorkar damdawi in tha bik tehna, National Quality Assurance Standards (NQAS)-a tling thar, Marpara PHC leh Zemabwk UPHC te hian a tehnaah 91.97% leh 95.98% te an hmu a ni.
Heti hian Mizorama sorkar damdawi in 54 te chu NQAS National Certificate nei tawh an ni a. Tunah hian sorkar damdawi in 16 leh HWC Sub-Centre 23-in state level certificate nei tawhin national-level assessment an dil mek a ni.
Hemi bakah hian Champhai District Hospital chuan nau neihna hmun tha bik tehna, LaQshya leh naupang enkawlna hmun tha bik tehna, MusQan certificate a hmu thar bawk a. LaQshya bikah hian 93.96% hmuin Platinum Badge an dawng a, MusQan-ah hian 96.57% an hmu bawk a ni.
NQAS certified damdawi in te hi endikna chhawng thum paltlang an ni a, a tawp bera endikna an hmachhawn hi National External Assessment a ni a, state pawn atangin endiktu an lo kal thin a. Hetah hian a tehnaa 70% an hmuh tlin chuan certified an ni chauh thin.