Dampa bial by-election atana kum upa leh pianphunga rualbanlo voter-te kalchilhin home voting team an feh chhuak.
Nilaini khan District Election Office, Mamit atangin Dampa Assembly Constituency by-election atana home voting team-te chuan Dampa bial chhung lut tanin, home voting atana dilna lutte an awm hmuna vote thlaktir turin an kalchilh.
November ni 11, 2025-a Dampa bial by-election neih turah Election Commission of India-in a phal ang leh home voting atana phalna a pekte atangin kalchilha vote thlak dilna form 12 leh 12A atanga dilna lut, kum upa mi 58 (85 chunglam) leh pianphunga rualbanlo voters pangaten vote hi an thlak dawn a ni.
Home voting ream-te hi team paliah inthenin, an chhuah hma hian Lalnunfela Chawngthu, Election Officer hovin an tihtur leh mawhphurhna hrang hrangte an inhriattir nawn leh a ni.
Dampa (ST) AC bial chhung polling station 19 atangin home voting dilna hi lut a awm a ni.