Aizawl: MPCC President Lal Thanzara chuan Chief Minister Lalduhoma’n Mizorama sorkarna lo chelh tawh, hotute hmasaten Chakma huat mipui an zirtir anga sawia Chakmate fuihpawrh zawnga thu a sawi chu thil pawi tak a nih thu a sawi.
W. Phaileng-a Congress worker-te’n Nilainia infuihtharna hun an buatsaih hmanpuitu, MPCC President chuan Mizoram hian chief minister tha tak tak a neih tawhten thu dik lo an sawi a hriat loh thu sawiin, tuna chief minister erawh kohhran upa nia, thubelhchian dawllo a sawi fo mai chu tha lo a tih thu leh, kohhran hotute pawhin sawipui ngam se a that a rin thu a sawi.
Hmanni lawka Chief Minister Lalduhoma’n Silsuri khuaah Mizorama sorkarna lo chelh tawh, hotu hmasa te’n Chakma huat mipui an zirtir ang khan a sawi tih sawiin Lal Thanzara chuan, “Chakma vote a duhna lamah khatianga a sawi kha a tih tur a ni lo va. Chief Minister sawi awm pawh a ni lo. Chief Minister chu Mizo mipuite tan pa nih tling a ni tur a ni a, khatianga Chakmate fuihpawrh zawnga thu a sawi kha thil pawi tak a ni. Khatiang khan tunhmaa chief minster-ten an sawi ngai lo,” a ti.
Lal Thanzara chuan MNF chu an hriat angin, hmarchhaka BJP thawhpuitu pawl NDA-ah an tel a, ZPM erawh an tel tih hriat chian ni lo mah se, central lamah chuan BJP sorkar an thlawp tih an hriat vek thu a sawi a. Sunday School kal thin, Mizo Kristian ni si chanchin tha puan dodaltu, BJP an thawhpuia an thlawp duh chu thil mak tak a nih thu sawiin, tuna Mizoram mamawh ber chu Congress sorkartir leh a ni tih a sawi bawk.