Phal loh damdawi tihtawp tuma hmalakna kal zelah Ghaziabad Police leh crime branch chuan Delhi-Meerut Road-a kudama ding truck pali atangin khuh damdawi hman phal loh bur nuai 15.7 an man tih Nilaini khan thuneituten an sawi.
Tun hnai maia hman phal loh damdawi tawlh man tawhtu, Sonbhadra Police hnen atanga an thudawn bawhzuia che chhuak, Nandgram Police leh crime branch hian mi pariat an man tel bawk.
Additional Commissioner of Police (Crime) Keshav Kumar Choudhary-a chuan Ghookna Mor bula ‘Machhli Godown’-a truck pali hi dapin Eskuf, Phensedyl leh Tapentadol an hai chhuak tih a sawi a. An thil phurh hi Indore atanga Guwahati thleng chinailung phur tur angin an lehkhaah chuan ziah a ni.
“Carton 1,150-ah bur 15,73,500 hmuh chhuah a ni a. An thil phurh hi chinailung ip phenah thukru takin a lo awm a ni,” tiin Choudhary-a chuan thuthar lakhawmtute a hrilh a. Rs vaibelchhe 3.4 man vel ni turin an chhut tih a sawi bawk.
Officer hian codeine behchhana siam khuh damdawite hi damdawi thila hman tura siam a ni a; mahse, tun hnaiah chutiang zawng ni lo, ruih nan leh thil dangah an hmang nasa tih a sawi.
“Sorkar pawhin hetiang damdawi hralh hi a khap tawh a. Himachal Pradesh-a Abott Pharma leh company dangte pawhin Phensedyl siam hi December, 2024 atang khan an lo tawpsan tawh a ni,” a ti.
Mi an mante hi Saurav Tyagi (37), Shadab (29), Shiv Kant (32), Santosh Bhadana (32), Ambuj (26), Dharmendra (49), Deepu Yadav (24) leh Sushil Yadav (35) te an ni a. Police chuan Tyagi leh Bhadana hi a thawntu, heng thil phurhnaa a bultumtu niin an sawi.
Thu an zawh fiahnaah an pahnih hian an khuh damdawite hi National Capital Region bakah state hrang hrang, Bangladesh thlenga hralh tura an ruahman a nih thu a sawi.
“Tyagi-a hi Ghaziabad Chemists & Druggists Association-a cashier a ni a, a hna avanga damdawi siamtu a hmelhriatte chu hetiang damdawi hralh ruk nan hian a hman phah a. Damdawi dawr pawh a nei,” tiin Choudhary-a chuan a sawi.
Khuh damdawi bakah hian police chuan pawisa Rs nuai 20, Creta car, laptop pahnih, rubber stamp pasarih, SIM card lem 10 leh lehkha lem siam chawp thahnem tak an mansak tel.
Additional commissioner chuan hetianga phal loh damdawi zuar leh tawlh thinte dap chhuak tur hian state dang bakah ramri pawn lam thlenga an thawhpuite nen hma an la zel tih a sawi.