Aizawl: BJP Mizoram State President Dr. K. Beichhua, MLA chuan Dampa bial by-election-ah BJP candidate Lalhmingthanga an thlan tlin chuan Dampa bialah hmasawnna an beiseite a takin an hmu ngei dawn tih a sawi.
Ningani khan BJP Mizoram President Dr K Beichhua’n Ailawng-ah an party mite a kawm a. An inkawmnaah thu sawiin, party pakhat hotuin BJP aia state sorkar an pawimawh zawk anga a sawi chu mi pangngai chuan ngaihdan tawk an thiam ngei a ring tih a sawi a. Mahni fate aia midang fate duhsak zawk tumah an awm loh avangin, central project-te chu state kaltlanga theh thlak ngai mah se, a bawhzuia nawr hlawhtling tur erawh chu BJP an pawimawh tih a sawi.
Siaha bialtu MLA ni bawk chuan, State sorkarin central-ah state project a thawn thlakahte pui tura an ngen angin, Mizoram tana hmasawnna tur anih avangin theih tawp chhuahin hma an laksak thin tih sawiin, “Mizoram mipui hriatah changtupa nih tum avanga thudik ziktluak lo sawi hi kan state hotu te hian ching tawh lo se, kan thil hriat zawng zawng puangchhuak turin min nawr lui lo hram turin ka ngen duh a ni,” a ti.
Union minister-te’n Dampa bial by-election-ah BJP candidate a tling a nih chuan an mamawh leh duh an thlente an tihhlawhtlinsak mai bakah, anmahni ngei an khawtlangah an kal leh dawn tih an sawi avangin, BJP candidate an thlang tling a nih chuan hmasawnna an beiseite an hmu ngei dawn tih a sawi.