Aizawl: Mizo Zirlai Pawl (MZP), Humanitarian & Development Research Initiative (HADRI) leh Australia Chin Community Council (ACCC) tangkawpin Mizoram chhunga raltlante tanpuina tur, Humanitarian Hub Enablement an tlangzarh.
Humanitariam Hub Enablement hi The Precinct Fortitude Valley, Queensland, Australia-ah Thawhtanni khan India sanaazing dar 5:30, Australia huna chawhma dar 10:15 khan tlangzarh niin, tlangzarhna hmunah Rajya Sabha MP K. Vanlalvena leh MZP General Secretary, C. Lalhmingsanga ten an telpui a. MZP President Dr C Lalremruata’n online kaltlangin a chhim.
Tlangzarh inkhawmah MP K. Vanlalvena chuan, Australia sorkar leh Australia chhunga Doners ho chu Humanitarian Hub kaltlangin Mizoram chhunga Zohnahthlak unau raltlante tanpuina pe turin a sawm.
MZP President Dr. C. Lalremruata chuan online (zoom) kaltlangin Humanitarian hub-in a tum leh Mizoram chhunga raltlante dinhmun tlangpui sawiin, raltlante chu Mizoram chhunga chengte chuan theihtawp chhuahin an lo kuangkuah tawh thu a sawi.
Managing Director of HADRI & G.S ACCC Lawmthang pawhin thusawiin, Mizoram mipuiin Myanmar atanga raltlante tha taka an lo dawnsawnna leh enkawlna avangin lawmthu a sawi a. Mizoramin tha taka an lo dawnsawn dan pawh sawiin, Australia sorkar hnenah Mizoram chhunga raltlante tana che chhuak ve turin a sawm nghal.
Senator of Australia Paul Scarr pawhin thu sawiin, raltlante a lo buaipui dan a hmuhin MZP chungah lawmthu a sawi a. An hmalakna a dah san hle thu sawiin, Australia sorkar hnenah raltlante tan Mizoram chhunga raltlante tana sanction turin sorkar a nawr tur thu a sawi.
HADRI CEO Mitchell King, ACCC President Ramtintheia, Managing Director of Village Support Ltd., & Founder and CEO of Athiei Foundation Beny Bol OAM ten thu an sawi bawk.
Airlink Regional Representative for Asia and the Pacific Claire Leow ten presentation neiin MZP, HADRI & ACCC te thawhhona thuthlung chu MZP aiawhin General Secretary C. Lalhmingsanga’n a hming a sign a ni.