Indonesian thuneitute chuan an rama tlang sang ber zinga mi, Semeru kang avangin mi 900 chuang hmun himah an sawn a, tlang lawn mi tangkhang 170 pawh Ningani khan an chhanchhuak bawk.
Java thliarkara tlang hi Nilaini khan vawi 10 inphuh chhuakin inralrinna sang ber khawn a ni mek a, maikhu leh vap a chhuah bakah a tlang awih pangah a phuh chhuah (lava) leh lungte km 13 lai a luang thla tawh bawk niin thuneituten an sawi.
Tlang lawn mite hi Nilaini zan khan tlang kang inphuh chhuahna atanga kea km 6.4 vela kal, dil awmna camp-na hmunah zankhuain an tang a, tunah erawh chuan him taka lak chhuah vek an ni tawh tih Semeru National Park thuneitu, Septi Wardhani-a’n a sawi.
Indonesia-a volcanology agency chuan chhum sa tak van lama inphuh chho leh tlang awiha lava luang laite an tichhuak.
December, 2021 khan Semeru tlang hi a inphuh chhuak tawh bawk a, mi 51 vel thiin a bul hnai khuate chu meivap leh khuin nasa takin a bawh.
Metre 3,676-a sang Mount Semeru hi Indonesia-a tlang kang 130 chuang zinga mi a ni a, an ram hi ‘Pacific Ring of Fire’ an tih, tlangkang leh lirnghing awm duhna, khawvela leilung innghah chhan hrang hrang intawhna laia awm a ni.
East Java-a rescue agency chuan mi thiar chhuah hna thawktu tur thahnem tak a dah a, a kanna hnaiha awm mi 956 chu sikul, mosque leh sorkar inah te dah an ni tih agency thuneitu, Prahista Dian-a’n a sawi.