Nigeria lailia Catholic sikul atangin mi sualten zirlai naupang leh thawktu mi 300 chuang an zai a, an rama a inruk bona lian ber a tling.
Christian Association of Nigeria chuan zirlai 303 leh zirtirtu 12-te hi St Mary’s School, Papiri, Niger state atangin ruk an ni tih sawiin a tira sawi aiin an tam.
Inruk bona a tam em em laia thleng niin kum 2014-a Chibok-a naupang 276 ruk aiin tun tuma mi hi a tam a ni.
Tual chhung police chuan mi sualte hi Zirtawpni zing dar 02:00 (India-a zing dar 06:30) velah sikul hi luhchilhin a lo awm zirlaite an hruai chhuak niin an sawi.
Police chuan venhim hna thawktuten ‘chhanchhuah tumin a bul vel ramngaw nasa takin an dap mek’ niin an sawi.
A tirah chuan zirlai 215 tia sawi a ni a, a hnuah sawi tam leh a ni a. An sawi hi a dik chuan sikula zirlai awm zahve dawn an ni dawn tih news agency AFP chuan a tar lang.
Niger state thuneitute chuan sikul beih tak hian tun hnaia sikul beihna a tam em avanga inkhar rih tura thupek an zawm lo niin an sawi a. Zirlaite leh thawktute chu ‘risk la lo turin’ tih ni mah se an inhawng niin an sawi a, sikul hian hemi lam hi an la sawi ve lo.
Mi sual pawl, tual chung miten bandit an tihte hian Nigeria hmun tam takah hetiang tih hi an ching a, tlanna sum an duh vang a ni.
Zirtawpnia zirlai ruk bo hi chawlhkar khat leh chhunga Nigeria a thlen vawi thumna a ni a. Thawhtanni kal ta khan an thenawm, Kebbi state-ah hmeichhe zirlai 20 chuang ruk an ni a, anni hi Muslim nia sawi an ni.
Chhim lam hret, Kwara state-ah biak ina inkhawm lai beiin mi pahnih thiin mi dang 38 hruai bo an ni bawk.
Nigerian President Bola Tinubu-a chuan South Africa-a G20 summit-a a tel tur leh ram dang tlawha a zin tur chu hetiang thil avang hian a sawi hlan a. Sorkar hian college leh sikul 40 vel khar rih turin thu a pe bawk.