Aizawl: Champhai DFO Lalbiakchama, IFS chuan Zirtawpni khan Farkawn Village Council, All NGO’s Farkawn leh Conservation Mizoram te hmalaknaa din, ‘Lurh Tlang Vavu Sanctuary, Farkawn’ chu Lurh tlangah a hawng.
Lurh tlangah hian Mizoram State Bird, Vavu (Hume’s Pheasant) an awm nual nia hriat a niin, he tlang hi nuam an ti hle a. Kumin May-September inkara chhinchhiah dan chuan Vavu puitling 20 (a pa 8 leh a nu 12) bakah a note pariat an awm a. Heng lo pawh hi Bualpui tlangdung leh Lurh kawng chung tlangdungahte pawh hmuh thin an ni bawk.
Khawtlang hruaitute leh Conservation Mizoram ten a humhalh hna thawkin, zirchianna kalpui mek zel a ni a, Vavu te hi nungcha mang mai hlauhawm dinhmuna ding mek niin, humhalh ngai tawh tak an ni.
Sanctuary hawngtu chuan Vavu pawimawhnate, State Bird a nihna leh Mizorama an tlem tawh ziate sawiin, community sanctuary-te siama humhalh a tul zia te a sawi a, Farkawn khua ten an humhalh avangin lawmthu a sawi a. Biodersity-a Mizoram hausak zia sawiin, Lurh tlang chhehvel hi dan hmanga humhalh tlat a ni tiin a ram mi ten a hlutna an hriat deuh deuh a pawimawh tih a sawi a. Hmasawnna hnathawh pawha theih chin chinah biodiversity tichhe lo zawnga hma lak a tul thu te, humhalh hna nasa zawka thawh a tul thu a sawi bawk.
Lurh tlang Vavu Sanctuary, Farkawn hi Sanctuary Managing Committee in mumal taka enkawl tura ruahmanna siamin, inkaihhruaina fel tak siam a ni a. A tlawhtu turten Sanctuary Managing Committee te biak hmasak zel tur a ni.