- Rinfela Zadeng
Kum 2026 chhunga Mizoram Presbyterian Kohhran Nilai leh Beihrual Thupui ‘Mizo Kristian Hlâte leh a phuahtute’, Rev. Lalfakzuala ziah hi tun tumah hian kan belchiang dawn a ni. Hetiang lam hawi hi Nilai leh Beihrual Thupuia kan la zir tam loh lam a ni a, a phurawmin a hlu dawn hle a, zir a chakawm tawh hle.
- A ziaktu chanchin tawi
Rev. Lalfakzuala hi Mzoram Synod Pastor tawnhriat ngah tawh tak a ni a, tunah hian Vaivakawn Pastor Bial a vawng mek bawk. Aizawl Theological College -ah hun rei tak zirtirtu hna a thawk tawh a, Thuthlung Hlui lama mi thiam a niin Kum 2016 -2020 chhung khan keini pawh min zirtir ve hman a ni. United Theological College – ah pawh Resgistrar a ni tawh a, North East India Christian Council/NEICC Vice President, Presbyterian Church of India/PCI General Assembly Executive Committe member, Council of Churches in Mizoram/MCC Executive Committee member leh Synod Mission Executive Member te a ni mek bawk. Thuthlung Hlui lam hawi lehkhabu pawh Mizo tawngin a tichhuak nual tawh bawk a, chungte pawh chu a hluin a tangkai hle.
- Lehkhabu pianhmang leh a chhung thu
Kum danga Nilai leh Beihrual Thupui bu ang bawkin he lehkhabu pawh hi pianhmabg fel tak nei, a kâwm sen uk lam niin phek 297 a chhah, ?120/- man chauh a ni a. January ni 7, 2026 atanga December ni 30, 2026 thlenga zirtur awmin zirlai thupui 47 a awm a. Beihrual Thupui zirlai 30 awm bawkin a vaiin zirlai 77 a awm a ni.
Zirlai 1 – na atanga 4 – na inkarah hian Pathian mite nuna hla pawimawhna leh Thuthlung Hlui lama Pathian fakna atana rimawi an hman thinte, Thuthlung Thar lama hla an sak thinte kan hmu a. Hla leh rimawi thiltihtheihna te pawh kan hmu bawk a ni. A ziaktu hi Bible zirmi a nihna hetah hian kan hmu chiang hle.
Zirlai 5 – na atanga zirlai 8 – na inkarah hian Mizo Kristian hla lo pian chhuah dan leh a than zel dan te, Mizo hla ziarâng leh Kristian Hla bu kan neih tan dan te kan hmu a. Hei hi nakin zelah pawh kan la zir nawn fo tur leh Mizo Kristian Hla chanchin/history atan pawha rotling la ni tur khawp hlu a ni.
Zirlai 9 – na atanga 15- na inkarah hian Zosap te hnen atanga Pathian fakna hla kan neih tan dan leh Rev. Chhuahkhama, Rev. Saiaithanga, Rev. Liangkhaia leh Upa Thanga te hnen atanga Pathian fakna hla kan neih tan dan ngaihnawm tak, tawi fel tak siin kan hmu chho leh a. Hei pawh hi keini thangtharte tana zir tlak leh ngaihnawm tak a ni.
Zirlai 16 – na atanga zirlai 18 – na inkarah hian kan tawnga hla min lehlinsak tute chanchin kan zir leh dawn a. Rev. Taisêna, Rev. Bankuaia leh Rev. R. Dala te’n Pathian hla kan sak tur min lehlin sak dan te kan zir dawn a ni. Tin, Pastor ni lo zinga kan mi thiam hmasa Hrawva te, Zakûnga te, Laibâta leh Suakropuia te sulhnu ropui tak tak kan hmu bawk a. Heng kan mi hmasate kuthnu kan hrechiang thei te hi a lawmawm hle.
Tin, Khasi lama kan unaute – Sahon Roy, Awmia (Omia) Nu, Rai Bhajur, Siniboni, Raja Singh Cornlay, Mohan Sigh, Simeon Ryanjah, Philip Roy leh Gilbert-a sulhnu leh chanchin kan han hmu te hi he lehkhabu hlutna belhchhah tu a ni a. Hetianga an chanchin chiang taka kan hriat hnuah hi chuan an hla an sakte pawh a nuam zual sawtin a rinawm.
Zirlai 19 – na atanga zirlai 35 – na inkarah hian Mizo Kristian hmasate irawm chhuak ngei hla leh a phuatute chanchin kan zir chho leh dawn a. Mizo Kristian Hla thar lo pianchhuah dan te, Mizo Kristian Hla phuah thiam hmasa Patea te rawn lang tanin C.Z Huala, R. L. Kâmlala, Saihhnûna, Suakliana, Zasiama, L. Kâmlova, Siamliana, Râlngama, Laithangpuia te kan hmu a. Hmeichhe lamah Zumi leh Thangvungi leh Lalruali te pawh kan hmu a. Pastor Chhawna, Hleia leh Taivela te, Rev. Thangngura leh hlapui phuahtu Vanmawia chanchinte kan hmu bawk a. Hengte hi a hluin kan hla phuah thiam hmasate chanchin awlsam taka kan hriat belh theihna tur lehkhabu hlu tak a ni.
- Hlapui phuahtu dangte leh Rokunga hla te
He lehkhabuah hian Rokunga hlate leh Hlapui phuahtu dangte chanchin kan zir dawn bawk a. H. Lâma, K. Papuia leh midang dangte chanchin kan hmu a. Rokunga chanchin leh a hla thlirna te hi zir a chakawm tawh hle. Keini thangthar zawkin kan hla phuahtu ropui chanchin kan han zir nawn leh turte hi kan vannei hle. Lalmâma, Liandâla, Thandanga leh Lalliansawma te chanchin leh an hla phuahte kan han zir thar leh turte hi a hlu takzet a ni.
A tawp lamah hian Mizo Kristiante hlain kawvel a thlir dan te, vanram ngaih hla te, chhandamna leh Lal Isua Krista tuarna hla te, hun hnuhnung (eschatology) kan thlir dan leh kan suangtuah dan leh hla hmanga kan puanchhuah dan te kan zir dawn bawk a ni. A tawp lam zirlai pali-ah hian Mizo Kristian rimawi hmanrua leh kan hnam nun te, Krismas hla leh Mizo Kristian hla hmalam thlirna te kan zir dawn bawk a ni.
Mizote hi zai ngaina tak hnam, kan awmkhawm hlek tawh chuan zai ngei ngei zel thin hnam kan ni a. Kum 2026 chhunga Pathian kan fakna hla chi hrang hrang leh a phuahtute chanchin kan han zir tur hi a lawmawm hle a. Tui tak leh hlim takin Pathian kan fak leh zual thei ngei ang tih a rinawm a. A ziaktu Rev. Lalfakzuala leh he zirlaibu zirtu zawng zawngte Pathianin malsawm rawh se.