Delhi-NCR huam chhunga boruak bawlhhlawh nasa lutuk duh lovin Pathianni khan mi tlem azawng India Gate bulah an pungkhawm leh a, hnawh darh tumtu police-te chu hmarcha dip hmangin an bei let niin thuneituten an sawi.
Police pathum pali velin hliam an tuar a, Ram Manohar Lohia (RML) Hospital-ah enkawl an ni tih an sawi.
Lungawi lohna lantirtute hian Delhi-a boruak ‘chhe lutuk’ huang ni reng chu a tikiang tura hma lak an phutna an au chhuahpui a. Police-in an um darh a ni.
“An zinga thenkhat hian C-hexagon lutin a dalna kan siam chu rawn sut tlang an tum a. A hnung lamah rikrum thila chet ngai ambulance leh damdawi ina thawk tam tak an tang tih hrilh kan tum a; mahse, a inhnial buai zawngin an che ta tlat a ni,” tiin officer-in a sawi.
Police hian boruak thunun tumin hma an la a, pungkhawmte pawh tawlh hnung turin an ti niin a sawi a. “An duh lo va, hungna an paltlang a, kawngah kalin an thu a. Kan team-ten awm sawntir an tum a, an zinga thenkhat chuan hmarcha dip hmangin an lo tilet a, pathum pali vel enkawl ngaiin an awm phah a ni,” a ti.
A hnuah pung khawmte hi lirthei che vel a buai tak tak hmain an awm sawntir thei a ni.
“Hetiang hi a thleng ngai lo. A vawi khat nan lungawi lohna lantirtuten hmarcha dip hmangin lirthei kal vel leh dan leh thupek kengkawhtu officer-te an bei a ni,” tiin Deputy Commissioner of Police (New Delhi) Devesh Kumar Mahla-a chuan PTI a hrilh.
Pathianni hmasa tlaiah khan India Gate bulah bawk hian Delhi leh a chhehvela boruak bawlhhlawh lutuk duh lo leh hma la tura thuneitute phutna lantir nan mi tlem azawng an lo pungkhawm tawh a, buaina lian chhuak lovin hren an ni a, chhuah zui an ni.
Ram khawpui berah hian thlasik laia thleng ziah angin tun lai hian boruak a bawlhhlawh leh hle tawh a, Pathianniah pawh khan hmun tam takah chuan boruak bawlhhlawh dan tehna, AQI chuan 400 a kai a, hei hi ‘hlauhawm’ huanga awm a ni.