Aizawl: DP&AR Minister K Sapdanga’n state dang kalphung tha zawk angin, mipuite tana awlsam nan leh rang zawka service pek chhuah a nih theih nan district administration-te chu mini-secretariat anga hnathawk turin kalpui tum a ni a, sorkarin hma a la chho mek tih a sawi.
Mizoram Civil Service Association (MCSA) Conference vawi 49-na, McCabe Hall, Aijal Club-a nimina neihah khuallian DP&AR Minister K. Sapdanga chuan thil eng emaw tih dawn hlek a, thingtlang kilkhawr zawk atanga Aizawl pan ngai kher lovin, District Headquarters-a tihfel mai theih turin thuneihna pawh hi semzai a ngai tih sawiin, “Decentralization of power tih dawn hian sorkar hnathawk thenkhat zingah pawh ui tlat, phal tlat lo, harsatna hlir ngaihtuah a awm theih a, chung pawh chu ram tana tha tur a nih chuan kan pal luih deuh pawh a ngai ang,” a ti.
Social media titia lar tak ‘Aizawl-centric thinking’ tih hi Secretariat-a officer tam zawkte, Aizawl pel lem lo an tam vang nia a lan thu sawiin K Sapdanga chuan, A mi mal an tha lo tihna ni lovin, Aizawl pawn pela ngaihtuahna neih an harsat em em thin a ni. Chung official-ten thil an lo duan tawh, political level-a lo siamrem chu a harsa tawh thin hle a. Hei vang hian sorkar policy tam takin thingtlang/mipui mimir a thlen phak loh phah fo a ni,” a ti.
K Sapdanga chuan Civil Service-te chu ram rorelna ruhrel structure an nih angin, Mizoram pum huap ngaihtuahna nei thei tur chuan Junior leh Senior Grade-ah field posting an ngah leh zual a pawimawh a, chutiang tur chuan transfer and posting pawh uluk takin an kalpui ang a, role-based, competency-based, right man at the right post ni thei turin sorkar chuan hma a la dawn tih a sawi bawk.
Mizoram Civil Service Association Conference chawhnu lam hunah hian sorkarin hma a lak mek, administrative reforms – Institutionalization of District Administration as an integrated Mini-Secretariat leh Ongoing Reforms and Progressive Decentralization of Land Revenue Administration chungchang an zir ho nghal a ni.